Два гады таму Таццяна Мечыславаўна памяняла прафесію ветурача на паштальёна. Пасля заканчэння ветэрынарнага факультэта Беларускай дзяржветакадэміі яе размеркавалі ў Бялыніцкі раён. Працавала ветурачом у калгасе «Перамога». Праз год узначаліла ветэрынарную службу гаспадаркі. Выйшла замуж. Нарадзіўся сын. Бацькі мужа дапамаглі маладой сям'і абуладзіцца. Збудавалі прасторны дом у аграгарадку Галоўчын. Муж Міхаіл Міхайлавіч працаваў таксама ў гаспадарцы. На МАЗе вазіў кармы, у жніво адвозіў зерне ад камбайнаў. Сельгаспрадпрыемства перажывала не самыя лепшыя часы. Маладая сям'я вырашыла заняцца гароднінаводствам. Узялі ў арэнду гектар зямлі, заключылі дамоўленасць з раённай нарыхтоўчай канторай на пастаўку гародніны.
У той час вызвалілася на пошце пасада паштальёна. Таццяна Мечыславаўна вырашыла памяняць прафесію. Муж і дзесяцігадовы сын Мікіта падсабляюць ёй.
У радасць Таццяне Мечыславаўне праца паштальёна. Цудоўная яна і гаспадыня. Дапамагае мужу ўпраўляцца на агародзе. Да нядаўняга часу Самавазавы трымалі карову. Добры прыбытак дае сям'і вырошчванне парасят. Попыт на іх вялікі ў вяскоўцаў.
Займаецца паштальён і падпіскай на перыядычныя выданні. Сярод найбольш трывалых чытачоў нашай газеты — былы спецыяліст сельгас-прадпрыемства Анатоль Аніскавец. Ён шмат гадоў не разлучаецца з «Сельской газетой». Любіць выданне за багатую тэматыку. Паштальён Таццяна Самавазава спадзяецца, што колькасць падпісчыкаў аграрнага выдання ў Галоўчыне будзе павялічвацца.
subbat50@mail.ru
Фота аўтара.
