Лепшыя ўзоры беларускай музыкi адкрывае слухачам Нацыянальны канцэртны аркестр
Чарговая серыя iмпрэз, якiя не першы ўжо год пры падтрымцы дзяржавы ладзяцца ў розных кутках краiны Нацыянальным канцэртным аркестрам Беларусi, адкрылася музычным святам у старажытным Заслаўi. Сёлета — у дзевяты ўжо раз, i па традыцыi з цiкавымi прэм’ерамi. Прыхiльнiкам iнструментальнай музыкi былi прадстаўлены дзве новыя, падрыхтаваныя знакамiтым калектывам, канцэртныя праграмы.
— Гэта творы двух выдатных кампазiтараў — Мечыслава Карловiча i Генрыха Вагнера. Яны жылi ў розныя часы i па-рознаму глядзелi на свет, iх шляхi ў мастацтве i музычная спадчына зусiм не падобныя, але абодвух яднае любоў да Беларусi, да яе народа i фальклору, што натхняла iх на стварэнне цудоўных кампазiцый, — гаворыць мастацкi кiраўнiк свята i галоўны дырыжор Нацыянальнага канцэртнага аркестра Беларусi, народны артыст краiны Мiхаiл Фiнберг.
Дададзiм, што сёння яднае гэтых кампазiтараў яшчэ i тое, што, дзякуючы намаганням музыказнаўцаў i музыкантаў аркестра, творы Карловiча i Вагнера, дагэтуль малавядомыя i незаслужана забытыя, зноў пабачылi свет з архiваў i запаснiкаў, атрымалi новае канцэртнае жыццё.
У музычным славянскiм свеце Мечыслаў Карловiч (1876 — 1909) праславiўся як польскi кампазiтар-сiмфанiст i дырыжор. Але каранi яго вядуць у Беларусь, колiшнi спадчынны маёнтак Карловiчаў знаходзiўся ў Вiшневе, на тэрыторыi сённяшняга Смаргонскага раёна. Бацька будучага кампазiтара — вядомы фалькларыст, фiлолаг i музыкант Ян Карловiч. Як сведчаць музыказнаўцы, яркiя тэмы беларускiх народных песень зiхацяць i ў творчасцi яго сына, у прыватнасцi, менавiта на iх заснавана славутая «Лiтоўская рапсодыя» Мечыслава Карловiча.
Кампазiтар Генрых Вагнер — наш сучаснiк, нарадзiўся i вырас у Польшчы, але другой радзiмай для яго стала Беларусь. У 1939 годзе Вагнер прыехаў у Мiнск з Варшавы, ратуючыся ад Другой сусветнай вайны. Як думалася спачатку, у часовую эмiграцыю, але, як атрымалася, на ўсё жыццё, неаддзельнае ад айчыннай гiсторыi i мастацтва.
Iнструментальныя творы Мечыслава Карловiча i Генрыха Вагнера прагучалi ў выкананнi камерных калектываў Нацыянальнага канцэртнага аркестра Беларусi. Сапраўдным упрыгажэннем свята стала сольнае выступленне знакамiтага маладога беларускага музыканта, скрыпача-вiртуоза Арцёма Шышкова. Завяршыў двухдзённую iмпрэзу гала-канцэрт сучаснай папулярнай музыкi — падарунак заслужанага калектыву жыхарам горада, якiя ўмеюць слухаць складаную музыку i радавацца добрай песнi.
Варта дадаць, што ў ходзе свята адбылiся таксама канцэрт i конкурс вучняў дзiцячых музычных школ i школ мастацтваў Мiнскай вобласцi, адкрыццё выстаўкi, прысвечанай творчасцi Мечыслава Карловiча, падрыхтаванай Дзяржаўным музеем гiсторыi тэатральнай i музычнай культуры, творчая сустрэча з вядомым беларускiм музыказнаўцам Вольгай Дадзiёмавай, чые цiкавыя i даступныя для шырокага кола слухачоў навуковыя каментарыi традыцыйна суправаджаюць падобныя асветнiцкiя iмпрэзы аркестра.
Дарэчы, свята ў Заслаўi — 84-е ў iх пералiку. Рух з мэтай адраджэння i папулярызацыi лепшых узораў беларускай музычнай спадчыны распачаты Нацыянальным канцэртным аркестрам па iнiцыятыве маэстра Фiнберга 15 гадоў таму. Вось i сёлета ўслед за Заслаўем музыканты адправяцца ў Нясвiж i Тураў, Мiр i Iванава, Чачэрск, Пiнск, Мсцiслаў, Жлобiн... У мiнулым годзе iх вiталi ў аграгарадках Магiлёўшчыны i Вiцебшчыны, цяпер яны завiтаюць да жыхароў Мiншчыны. Пераважную колькасць сваiх выступленняў славуты калектыў дае ў так званых малых гарадах краiны.
Мiж iншым, i сёння ўвечары Нацыянальны канцэртны аркестр выступае на Капыльшчыне. Месца абрана невыпадкова: гэта родныя мясцiны беларускага паэта Адама Русака, творчасцi якога i 105-годдзю з дня нараджэння прысвечана прэм’ерная праграма. Усяго ж заслужаным калектывам створана 27 новых песенных праграмм на словы беларускiх аўтараў.
На здымку: на заслаўскай сцэне скрыпач Арцём ШЫШКОЎ.