Нядаўна збіраліся ўсе разам. Радаваліся, што маем магчымасць узяць газеты і прачытаць іх дома. Дарэчы, як сказалі дзяўчаты, “Голас Радзімы” трэба чытаць “дома, у цішы і вельмі ўважліва”. І тады нібы вяртаешся на Радзіму, і “ўспамінаецца ўсё да драбніц, што звязана з родным краем”.
Шмат цёплых слоў гучала ў адрас рэдакцыі. Наша ўдзячнасць і за артыкул “Палюбіць вельмі проста” — пра цікавага чалавека, паэта Алеся Гібка-Гібкоўскага. Дзякуючы тэксту і мы зацікавіліся: што за песня “Палюбіць Беларусь вельмі проста”? Аказалася, сапраўды вельмі прыгожая. Слухалі запіс у выкананні ансамбля “Радзімічы” некалькі разоў! Вырашылі: песню вывучым і будзем спяваць. Спадзяемся, аўтар тэксту і выканаўцы знойдуць паразуменне ды прадоўжаць плённае супрацоўніцтва.
Кожны раз, як атрымліваю канверт з газетай з роднай Беларусі, мяне ахоплівае радасць. Здорава, што ёсць цудоўнае выданне “Голас Радзімы”, якое спецыяльна робіцца для супляменнікаў у замежжы. Вось мы даведаліся: сёлета газеце — 60 гадоў. Раней я ў інтэрнэце глядзела тэксты. А трымаць “весткі з Радзімы” ў руках — гэта зусім іншае адчуванне. Газета прыносіць нам радасць і добры настрой, гэта духоўны “мосцік”, які з’ядноўвае нас з Бацькаўшчынай.
Таццяна Дзяменнікава, г. Мікалаеў, Украіна