11 верасня Мiнск з размахам адзначыць сваё 954-годдзе. Падрыхтавана шырокая праграма. Асноўныя падзеi свята расцягнуцца на тры днi па ўсiм горадзе, а галоўнай пляцоўкай гулянняў стане тэрыторыя каля Палаца спорту. Там адкрыецца святочны кiрмаш i пройдуць самыя вiдовiшчныя мерапрыемствы. Больш падрабязнай iнфармацыяй аб тым, як пройдзе Дзень горада Мiнска, падзялiўся начальнiк упраўлення культуры Мiнгарвыканкама Вiталь Брэль.
На дні святкавання 954-годдзя Мінска запланавана больш за 130 мерапрыемстваў.
Насычаная праграма
На гэтыя днi запланавана больш за 130 мерапрыемстваў. Напярэдаднi свята, 10 верасня, у Мiнскай гарадской ратушы пройдзе ўзнагароджанне мiнчан, якiя прымаюць актыўны ўдзел у ахове грамадскага парадку. У гэты ж дзень у Беларускiм дзяржаўным маладзёжным тэатры шматдзетным мiнчанкам уручаць ордэн Мацi.Праграма галоўнага дня пачнецца ў 11:00 з урачыстага ўскладання кветак да абелiска «Мiнск — горад-герой». Побач на тэрыторыi парку Перамогi чакае ваенна-патрыятычнае свята Дзень танкiстаў — з выставай баявой тэхнiкi i паказальнымi выступленнямi вайскоўцаў. У 12:00 святочная эстафета пяройдзе на пляцоўку каля Палаца спорту, дзе пачнецца Маладзёжны музычны фестываль: пяць сцэнiчных пляцовак, папулярныя выканаўцы i музычныя калектывы, забавы ў вiртуальнай рэальнасцi, лега-гарадок для дзяцей i зона адпачынку. Хэдлайнер фестывалю — рэпер Сярога. Таксама на гэтай пляцоўцы разгорнуцца гарачыя спаборнiцтвы за званне лепшага пажарнага-ратавальнiка.
Пройдуць гуляннi i ў кожным раёне горада: конкурсы i спартыўныя мерапрыемствы з выязным гандлем, квест-гульнi, фестывалi дзiцячай творчасцi, турыстычны спрынт, фотавыставы i выставы мастацкiх рамёстваў. Усё гэта адбудзецца ў знакавых месцах — напрыклад на «Чыжоўка-Арэне», у парку iмя Паўлава, Цэнтральным дзiцячым парку iмя Максiма Горкага. Усяго дзевяць пляцовак.
Хто рана ўстае
Лейтматывам нядзелi стануць спорт i творчасць. Доўгачаканы Мiнскi паўмарафон стартуе ад Палаца спорту ў 09:00 i абяцае быць вельмi масавым. Сёлета ён збярэ каля дзесяцi тысяч удзельнiкаў, ахапiўшы цэнтральныя праспекты, вулiцы i самыя знакамiтыя месцы Мiнска. На маршруце забегу марафонцаў чакаюць 12 музычных iнтэрактыўных пляцовак. Першымi ў 09:00 стартуюць бегуны на дыстанцыях 21,097 i 10,55 кiламетра, а ў 11:45 — на 5,5 кiламетра.ikras@sb.by
