Сапраўдны сюрпрыз для аўтавазаўцаў Тальяці зрабіў Цэнтр беларускай культуры “Нёман”, якім кіруе Леанід Міхаленка. Па запрашэнні Цэнтра ў госці да тальяцінцаў прыязджаў народны ансамбль музыкі і песні з горада Валкавыска.
Цяпер у Тальяці пражывае каля 6000 беларусаў, большая іх частка працуе на АўтаВАЗе.
У складзе Цэнтра беларускай культуры “Нёман” — 123 чалавекі. Гэта, у асноўным, зноў жа работнікі тутэйшага аўтазавода, а таксама настаўнікі, пенсіянеры, юрысты.
Цэнтр — месца сустрэчы тальяцінскіх беларусаў, якія аб’ядналіся не толькі для падтрымкі адзін аднаго, але і для прапаганды беларускай культуры і галоўных рыс беларускага народа — гасціннасці, працавітасці, высокай маралі і дабраты.
Аднак вiзiтнай карткай “Немана” з’яуляецца фальклорны ансамбль «Купалінка», створаны ў 2005 годзе (мастацкi кiраўнiк ансамбля — Людміла Дземіна), які ўпершыню заявіў пра сябе на свяце, прысвечаным Дню Незалежнасці Беларусі, а на вялікую сцэну выйшаў падчас удзелу ў фестывалі “Дружба народаў”, што праходзіў у філармоніі Тальяці.
Сёлета Людміла Дземіна пабывала ў Мінску па запрашэнні таварыства “Радзіма”, дзе пазнаёмілася з галоўным спецыялістам аддзела па ідэалогіі Валкавыскага райвыканкама Аляксандрам Грыко. Даведалася аб тым, што ў Валкавыску ёсць ансамбль “Уладары” — выключна мужчынскі калектыў. І запрасіла прыехаць да беларусаў у Тальяці, каб даць там некалькі канцэртаў.
“Уладары” прыехалі і пакарылі тальяцінцаў з першай песні Нездарма назва калектыва пераводзіцца на расійскую мову як “Властелины”. А на АўтаВАЗ яны змаглі трапіць дзякуючы таму, што цэнтрам беларускай культуры “Нёман” кіруе намеснік начальніка тэхналагічнага аддзела завода Леанід Міхаленка. Дзякуючы яму і Людміле Дземінай, якая таксама працуе на АўтаВАЗе, і было арганізавана выступленне.
Планавалася прымеркаваць выступленне да чарговай гадавіны яднання брацкіх народаў Расіі і Беларусі, але да Тальяці “Уладары” змаглі даехаць пазней, бо тут, у Беларусі, прымалі ўдзел у праекце “Песні маёй краіны”, у якім выспупілі з вялікім поспехам.
Дарэчы, калектыў гэты аматарскі, прафесійных музыкантаў у ім няма. І гэта ўражвае больш за ўсё. Мастацкі кіраўнік ансамбля, дырэктар Валкавыскага Дома культуры Вадзім Бычак расказвае, што ў складзе калектыву ёсць настаўнік, супрацоўнік дэпартамента аховы, ваеннаслужачы... Між тым, ансамбль пастаянна ўдзельнічае ў розных конкурсах і тэлевізійных праектах.
Дарэчы, сустракаючы гасцей з Беларусі, тальяцінская “Купалінка” таксама не падкачала і адказала беларусам “партызанскімі прыпеўкамі”.
Між іншым, мэтай візіту гасцей было яшчэ і тое, каб наладзіць самыя актыўныя стасункі паміж Тальяці і Валкавыскам. Тэрмінам на тры гады была падпісана дамова паміж Цэнтрам беларускай культуры “Нёман” і Валкавыскім райвыканкамам, якая прадугледжвае пашырэнне супрацоўніцтва ў самым шырокім сэнсе.
Галіна Навіцкая, каардынатар праектаў Таварыства “Радзіма
“Уладары” пакарылі тальяцінцаў
Як справы, дыяспара?Сапраўдны сюрпрыз для аўтавазаўцаў Тальяці зрабіў Цэнтр беларускай культуры “Нёман”, якім кіруе Леанід Міхаленка. Па запрашэнні Цэнтра ў госці да тальяцінцаў прыязджаў народны ансамбль музыкі і песні з горада Валкавыска