Гэта вялікае, рознаколернае свята сабрала каля двух тысяч чалавек. Руплівыя гаспадыні ды гаспадары мелі шанец набыць у Івянцы адметную мэблю, саматканыя ручнікі, дываны, пляцёнкі... І шмат чаго яшчэ! Увесь дзень на старадаўнім пляцы ладзіліся і адмысловыя творчыя кірмашы. “Стварайце з мастакамі, майстрамі, гандлярамі!” — гучаў дэвіз свята. А таму і ўвогуле кірмаш у Івянцы атрымаў назву Творчы. Акрамя спеваў, гульняў, танцаў, тут можна было даведацца пра сваё паходжанне ды навучыцца складаць радавод. А яшчэ — зазірнуць у будучыню з дапамогай варажбітак, прадэманстраваць уласную дужасць ва ўздыманні гір і нават… знайсці сабе жонку на Кірмашы вяселляў і новых знаёмстваў.А яшчэ ўсіх запрашалі паўдзельнічаць у дэгустацыі цукерак. Каб трапіць на гэты своеасаблівы кірмаш, мы набылі спецыяльныя квіткі, пачакалі сваёй чаргі. І гэта таго каштавала. Цукерак я паспрабавала шмат: ад традыцыйных “Каровак”, што вырабляюцца на мясцовым кандытарскім прадпрыемстве “Івкон” больш за 40 гадоў, да “Салодкай энцыклапедыі”: там пад фанцікам можна знайсці цікавую інфармацыю пра 40 аб’ектаў сусветнай культурнай спадчыны, кшталту Мірскага замку. “А ўлетку ў Івянцы і Цукеркавы фэст праходзіў”, — з гонарам паведаміла дзяўчына, якая прэзентавала прысмакі. Дзіўлюся: “Гэта колькі ж цукерак трэба?!” “Зашмат цукерак не бывае”, — усміхаецца яна ў адказ.
Дарэчы, Івянецкі Творчы кірмаш арганізатары абяцаюць зрабіць традыцыйным — як і Цукеркавы фэст, у якога ўжо шмат прыхільнікаў.
Яня Пакроўская
