На лета магілёўская Цэнтральная гарадская бібліятэка імя К. Маркса пераязджае ў Камсамольскі сквер.
З 13 чэрвеня кожны чацвер і пятніцу з 11.00 да 16.00 тут будуць выстаўляць вялікі чырвоны парасон, а пад ім — стол для чытання. З прэсай таксама можна будзе пасядзець ля фантана і на лавачках, што размешчаны побач. Пагартаць наведвальнікам прапануюць шэраг разнастайных часопісаў. Будзе тут устаноўлены і стэлаж для буккросінгу.
Акрамя таго, загадчык аддзела абслугоўвання і інфармацыі Алена Астапава расказала, што пры жаданні ў скверы людзі змогуць запісацца ў бібліятэку. Дарэчы, у мінулым годзе гэтай магчымасцю скарысталася больш за 300 чалавек.
Працаваць «чытанка» пад адкрытым небам будзе да 23 жніўня. Выключэнне складуць хіба што дні, калі на дварэ будзе ліць моцны дождж.