Хто ў гэтым годзе выказаў жаданне прадстаўляць краіну на Еўрабачанні?

Але ці будзе інтрыга? Вось у чым пытанне. Наша краіна ўдзельнічала ў гэтым конкурсе ўжо трынаццаць разоў. Ледзь не кожны год арганізатары імкнуліся знайсці больш-менш дасканалую сістэму адбору прадстаўніка. І кожны раз наступалі на адны і тыя ж граблі. Сёлета зноў новы паварот. Гледачам далі роўныя магчымасці для галасавання разам з журы, але апошняе слова застаецца за прафесіяналамі. Такое мы ўжо бачылі, таму гучнай гэтую навіну не назавеш. А вось пункт 8 Палажэння аб правядзенні нацыянальнага адбору на конкурс песні «Еўрабачанне-2017» заслугоўвае асаблівай увагі. Чытаем уважліва: «Да ўдзелу ў Праекце ў якасці выканаўцы песні дапускаюцца грамадзяне Рэспублікі Беларусь, а таксама замежныя грамадзяне і асобы без грамадзянства, якія на дату падачы заявы аб удзеле ў Праекце дасягнулі шаснаццаці гадоў». Іншымі словамі, ласкава запрашаем, грамадзяне замежнікі!

З аднаго боку, найлепшы вынік за ўсю гісторыю нашага ўдзелу ў «Еўрабачанні» — шостае месца Дзмітрыя Калдуна — быў атрыманы дзякуючы Філіпу Кіркораву. З другога — прадзюсар-замежнік — гэта адно, а артыст, які не мае ніякіх адносін да Беларусі, — зусім іншае. Але так лічаць не ўсе. Расія, Украіна, Латвія, Туркменістан, Нігерыя — як вам такая геаграфія? Жыхары менавіта гэтых краін выказалі жаданне паспаборнічаць у беларускім нацыянальным адборы. Вядома, у першую чаргу цікавіць, хто ж тыя расіяне, што падалі заяўкі? «Лістоў ад Сяргея Лазарава і Філіпа Кіркорава няма. Ад Максіма Фадзеева і спявачкі Наргіз, якіх так чакаюць усе нашы СМІ, таксама», — тоўстую кропку ў гэтай справе паставіла кіраўнік прэс-службы Белтэлерадыёкампаніі Святлана Смалонская-Краскоўская. Іншыя прозвішчы прадстаўнікоў гэтай краіны гучнымі ніяк не назавеш, хутчэй наадварот. Хаця нельга выключаць, што сярод іх якраз і ёсць цёмны конік.

Атрымліваецца, што за пуцёўку ў Кіеў такі будуць змагацца беларусы? Спачатку, як падалося, чуткі пра магчымае з’яўленне ў конкурсе расійскай зоркі крыху напалохалі нашых артыстаў: заявак было катастрафічна мала. Але ў апошнія дні яны літаральна пасыпаліся. Нарэшце іх больш за шэсцьдзясят. Гэта крыху менш, чым было ў мінулым годзе. Пакуль рана гаварыць, наколькі якасна змяніўся склад удзельнікаў адбору, але відавочна, што ён стаў не такім бліскучым: зорак нашай эстрады можна пералічыць па пальцах. Віталь Варанко, Navi, Nuteki,  Napoli — магчыма, вы калі-небудзь і чулі гэтыя прозвішчы і назвы, тым больш што некаторыя ўжо не першы раз імкнуцца трапіць на гэты прэстыжны міжнародны конкурс. 

Словам, пакуль яшчэ мала што зразумела. Заўтра адборачная камісія назаве 10—15 удзельнікаў, якія і будуць спрачацца за адну пуцёўку на конкурс. Тады бліжэй прыгледзімся да музыкантаў і вызначымся са сваімі фаварытамі. Дзякуй богу, глядацкае галасаванне пакуль не адмянялі.

Украіна можа пазбавіцца права на правядзенне конкурсу «Еўрабачанне» ў 2017 годзе, калі не паспяшаецца з яго арганізацыяй. Пра гэта паведаміў генеральны дырэктар Нацыянальнай тэлерадыёкампаніі (НТРК) Украіны Аляксандр Харэбін. Як стала вядома, яшчэ ў пачатку кастрычніка Еўрапейскі вяшчальны саюз, які з`яўляецца арганізатарам конкурсу, паказаў НТРК чырвоную картку «з-за фактычнага зрыву падрыхтоўкі да конкурсу». Сярод прычын былі ўказаны «бюракратыя, недасканаласць заканадаўчых актаў і грэблівае стаўленне некаторых чыноўнікаў да конкурсу». Канчатковае рашэнне па пытанні аб тым, ці забараняць Украіне праводзіць конкурс, будзе прымацца на пасяджэнні Еўрапейскага вяшчальнага саюза     8 снежня. Цікавая інфармацыя: Украіна заклала ў бюджэт 15 мільёнаў еўра на правядзенне «Еўрабачання». Гэта, напрыклад, у тры разы менш, чым было выдаткавана на конкурс у Азербайджане ў 2012 годзе.

stepuro@sb.by