У апараце Упаўнаважанага па справах рэлігій і нацыянальнасцей Рэспублікі Беларусь адбылася сустрэча беларуска-польскай камісіі па разгляду сітуацыі, якая склалася вакол грамадскага аб’яднання “Саюз палякаў на Беларусі”, паведамляе БелТА.
Беларускі бок прадстаўляў Упаўнаважаны па справах рэлігій і нацыянальнасцей Леанід Гуляка, польскі — намеснік міністра замежных спраў Анджэй Крэмер. Таксама прысутнічалі пасол Польшчы ў Беларусі Генрык Літвін і прадстаўнікі МЗС Беларусі.
Леанід Гуляка праінфармаваў удзельнікаў сустрэчы аб дзяржаўнай палітыцы Беларусі адносна нацыянальных супольнасцей, іх прававым статусе і асноўных напрамках грамадскай дзейнасці.
Былі выказаны пазіцыі польскага і беларускага бакоў па ўрэгуляванню канфлікту ў асяроддзі польскай нацыянальнай супольнасці, звязанай з сітуацыяй вакол ГА “Саюз палякаў на Беларусі”. Удзельнікі сустрэчы таксама шукалі шляхі садзейнічання яго канструктыўнаму ўрэгуляванню. Па выніках сустрэчы бакі дамовіліся аб прадаўжэнні дыялога па гэтай праблематыцы.