У чарговы раз у ліцэйскі клас

На працягу апошніх пяці гадоў гэты ліцэй у Івацэвічах здзіўляе і здзіўляе: як правіла, звыш 90 працэнтаў выпускнікоў паступаюць у вышэйшыя навучальныя ўстановы, а з улікам залічэння ў сярэднія спецыяльныя і наогул выходзіць 100-працэнтны вынік. “Дзеці прыходзяць у ліцэй за ведамі, а не проста за атэстатам”, — называе адну з прычын такого поспеху дырэктар ліцэя Яўген Пішчаў.
Ідзём па калідоры. Незвычайна ціха. Але, як толькі падаў свой голас ліцэйскі званок (па сваёй мелодыцы ён, паверце, ад школьнага нічым не адрозніваўся), адразу ж на калідоры стала шматлюдна. Толькі ліцэісты ў адрозненне ад школьнікаў былі нейкімі незвычайна дарослымі.
— У нас толькі самыя старэйшыя класы — дзесятыя, адзінаццатыя і дванаццатыя. У цэлым каля 250 вучняў і 12 класаў, — патлумачыў дырэктар.
Раней былі і перадліцэй-скія класы. У вучня было больш часу адаптавацца да паглыбленага вывучэння дысцыплін. Але заканадаўства змянілася, і ў такія класы ўжо не набіраюць.
“Уявіце, прыехаў хлопец з вёскі. Палова года пайшла на тое, каб прызвычаіцца. Толькі ўзяўся за навуку, а праз паўтара года трэба развітвацца з ліцэем”, — тлумачыць Яўген Пішчаў. — Бацькі звяртаюцца, патрабуюць узяць іх дзяцей у перадліцэйскія класы. Але што я магу зрабіць?” — разводзіць рукамі ён.
І сапраўды, дзіўна неяк атрымліваецца: жадалі як лепш, а атрымалася так, як атрымалася.
— Напэўна, і конкурс у ліцэй высокі? — пытаемся ў дырэктара.
— Сярод жыхароў Івацэвічаў, сапраўды, некалькі чалавек на месца. А вось прэтэндэнтаў — вучняў сельскіх школ — бяром амаль што ўсіх, — некалькі здзівіў сваім адказам ён.
Проста, тлумачыць дырэктар, выпускнікі сельскіх школ пры паступленні ў ВНУ і ССНУ карыстаюцца льготамі. Калі ж ты пасля вясковай школы два апошнія гады праводзіш у ліцэі, то такія прывілеі страчваеш, бо за кароткія два гады адразу ж становішся “гарадскім”. Таму хтосьці, канешне, выбірае льготы, але ёсць нямала і тых, хто згаджаецца ахвяраваць сельскімі перавагамі дзеля грунтоўных ведаў. Як такіх не ўзяць?
Дырэктар падвёў да акна. “Для сельскіх ліцэістаў, — паказаў на невялікі будынак праз дарогу, — мы ў былым памяшканні дзіцячага садка адкрылі інтэрнат на сто месцаў”.
Чаму ж выгадна вучыцца ў ліцэі? Тут паглыблена на працягу двух гадоў можна вывучаць менавіта тыя дысцыпліны, якія прыўдзецца потым здаваць пры паступленні. Хочаш больш — можаш наведваць бясплатныя і платныя факультатывы. Лічы, што тыя самыя заняткі з рэпетытарам, толькі абыходзяцца яны бацькам значна танней.