Цікава, весела і смачна

Чым здзіўляў гасцей фестываль нацыянальных культур

Адгадайце загадку: “Увесь свет — у адным горадзе”. Ведаючы, куды напрыканцы мінулага тыдня вялі ўсе дарогі, адказ даць не складана. Гэта Гродна падчас заключных мерапрыемстваў XII Рэспубліканскага фестывалю нацыянальных культур.


Ад разнастайнасці прадстаўленых народных касцюмаў, кулінарных шэдэўраў, каларытных сувеніраў разбягаліся вочы. Не паспеў паспрабаваць татарскага кыстыбая, як палякі ўжо падносілі галушкі і бігас, а грузіны прапаноўвалі хачапуры і чурчхелу. Толькі танцаваў армянскі качары, а ногі ўжо самі вялі ў палымяны лацінаамерыканскі танец. Выйшаў з казахскай юрты, а азербайджанцы ўжо гасцінна клікалі ў сваё нацыянальнае жытло. Каб змяніць краіну ці кантынент, дастаткова было зрабіць некалькі крокаў.

Нацыянальныя падворкі, якіх сёлета было 19, — бясспрэчная асаблівасць фестывалю, але не адзіная. З кожным годам свята здзіўляе гасцей свежым фарматам, цікавымі флэшмобамі, новымі аб’ектамі. Сёлета, да прыкладу, горад узбагаціўся помнікам легендарнаму палкаводцу князю Давыду Гарадзенскаму, назіральнай пляцоўкай на высокім беразе Нёмана, з якой адкрываецца выдатны від на асноўныя гарадскія славутасці, і культурна-выставачным цэнтрам “Фестывальны” — цяпер акунуцца ў атмасферу свята можна будзе незалежна ад часу візіту. Яскравым падарункам гораду стала механічная дыярама, дзе 12 фігурак-лялек у нацыянальных касцюмах пад музыку кружацца ў танцы. Шматлікія госці сышліся на думцы, што гэтыя “жывыя скульптуры” выдатна ўпісаліся ў еўрапейскі фармат Гродна.


Упершыню фестываль змяніў лакацыю і на трэці дзень пераехаў на Аўгустоўскі канал. Тут бавіліся гульнямі народаў свету, частаваліся каларытнымі стравамі, вудзілі рыбу і ўвогуле добра праводзілі час. Атрымаўся цёплы сяброўскі пікнік рэспубліканскага маштабу, і няважна, што ў кагосьці іншы колер скуры або іншае веравызнанне. У нашай краіне пражываюць прадстаўнікі звыш 140 нацыянальнасцей і ўсе знаходзяць агульную мову. Мы не шукаем адрозненні, але радуемся, што можам дзяліцца сваімі традыцыямі і дзякуючы гэтаму ўзбагачаць сваю культуру.

— Гэты фестываль найлепшым чынам падкрэслівае гатоўнасць беларусаў жыць у міры і згодзе, паказвае, як важна шанаваць свае карані, любіць сваю зямлю, з павагай і ўвагай ставіцца адзін да аднаго, да звычаяў і традыцый іншых народаў, — упэўнены міністр культуры Юрый Бондар.

mila@sb.by


Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...