Многія распрацоўкі паказваюць на 3D-мадэлях.
Пераканаўчая розніца
Кампанія актыўна працуе над вырабамі з палімерных матэрыялаў.
— Сучасныя вырабы, асабліва з далёкага замежжа, вельмі дарагія. Беларускія аналагі ў разы таннейшыя. Напрыклад, імпартная спінальная канструкцыя для дзяцей з прыроджанай паталогіяй пазваночніка, вырабленая з улікам індывідуальных асаблівасцей з выкарыстаннем 3D-друку, каштуе недзе 25 000—30 000 долараў. Падчас рэалізацыі праграмы Саюзнай дзяржавы НВ ТАА «Медбіятэх» разам з вядучымі медыцынскімі ўстановамі Расіі і Беларусі распрацавала яе аналаг. Каштуе каля 2500 долараў, прычым з лепшымі тэхнічнымі характарыстыкамі, — прывёў пераканаўчы довад Уладзімір Гарбацкі. — А якасць нашых канструкцый не толькі не горшая, але часам у разы лепшая за імпартныя.
Дырэктар «Медбіятэха» дэманструе невялікую частку распрацовак: спінальныя канструкцыі, у тым ліку і дзіцячыя (кожная зроблена асобна, іх можна мадэліраваць, збіраць, як канструктар лега, і атрымліваць прыдатны варыянт для кожнага медыцынскага выпадку), тытанавыя пласціны для ўстаранення дэфектаў чэрапа, знешнія канструкцыі і нават пратэз вока. Многія распрацоўкі паказваюць на 3D-мадэлях. Яны збіраюцца пад кожнага пацыента індывідуальна.
— Да нас звяртаюцца з канкрэтным запытам. Па рэнтгенаўскім здымку чалавека робім прататып на 3D-прынтары. У далейшым працуем па ім, — сцісла абмалёўвае алгарытм дзеянняў Уладзімір Гарбацкі.
Штогод кампанія з нуля распрацоўвае каля 5—8 новых канструкцый.
Малы залатнік, ды дарагі
Невялікае месца сярод распрацовак займаюць маленькія прамавугольныя і цыліндрычныя матэрыялы. Нягледзячы на знешнюю непрывабнасць, цяпер яны самыя каштоўныя экспанаты гэтай выставы. Жаўтаваты порысты кавалачак — ультрасучасны кальцыйфасфат. Яго выкарыстоўваюць для папаўнення дэфіцыту касцяной тканкі. Пасля ўжыўлення ён біядэградзіруе і ператвараецца ва ўласную костку. На сёння гэта апошняе слова ў медыцыне.
Распрацаваныя дэталі можна збіраць, як канструктар лега.
— Яго прывабнасць у тым, што, трапіўшы ў арганізм, кальцыйфасфат уступае ва ўзаемасувязь з уласнымі касцянымі структурамі. У выніку дэфектны ўчастак пачынае зарастаць. Ужыўлены матэрыял біядэградзіруе, і мы атрымліваем цэлую асноўную костку, — апісвае магічныя здольнасці нашага арганізма разам з сучаснымі медыцынскімі рашэннямі Уладзімір Гарбацкі і дзеліцца планамі: — Праз два гады мы мяркуем выйсці на прамысловую вытворчасць канструкцый з кальцыйфасфату. Гэта будуць гелі, парашкі, надрукаваныя на 3D-прынтары касцяныя адломкі.
Асноўны матэрыял у імпланталогіі — тытан. Ён рэнтгенакантрастны і біясумяшчальны з арганізмам чалавека. Але цяпер кампанія актыўна працуе над палімернымі матэрыяламі. Дарэчы, у нашай краіне такія канструкцыі пакуль не прымяняюць. На працягу некалькіх гадоў сітуацыя можа і павінна змяніцца, думае распрацоўшчык.
— Да канца гэтага — у наступным годзе з’явяцца канструкцыі для лячэння плоскаступнёвасці ў дзяцей, разрыву звязак у спартсменаў, пераломаў плечавога сустава. Працуем і над малаінвазіўнымі метадамі ўстаноўкі спінальных канструкцый, — пералічыў важныя планы Уладзімір Гарбацкі.
