Галоўная каштоўнасць музея — сапоцкінскія пісанкі. Тэхналогія іх вырабу ўключана ў Дзяржаўны спіс гісторыка-культурных каштоўнасцей Беларусі як элемент нематэрыяльнай культурнай спадчыны. Адметна, што ў музеі ў г.п. Сапоцкін можна не толькі ўбачыць арыгінальныя велікодныя яйкі, але і самім паспрабаваць іх распісаць.
Яйкі да Вялікадня размалёўваюць у розных рэгіёнах краіны. Хтосьці выкарыстоўвае прыродныя матэрыялы, хтосьці — штучныя фарбы. У Сапоцкіне — свой унікальны спосаб. Для роспісу яек, паведамляе livingheritage.by, вырыстоўваецца спецыяльны самаробны інструмент «шпілька» (палачка з убітым у тарэц цвічком), пчаліны воск, натуральны фарбавальнік чорна-карычневага колеру з настою кары дуба, альхі, альховых шышак і ржавага жалеза. Цікава, што фарбу рыхтуюць задоўга да свята — кара з жалезам павінны настаяцца ў вадзе не менш за месяц.
Самы папулярны ўзор на сапоцкінскіх пісанках — круг-разетка, які размяшчаецца па цэнтру яйка. Свабодныя плошчы запаўняюцца паўразеткамі, кропкамі, ланцужкамі. Любяць мясцовыя майстрыхі малюнкі птушак, яловых галінак, кветак, лістоў.