Варта адзначыць, што Музей старажытнабеларускай культуры з’яўляецца сапраўднай скарбніцай рэдкіх ікон. Многія з іх знойдзены падчас экспедыцый супрацоўнікаў Акадэміі навук па беларускіх мястэчках некалькі дзесяцігоддзяў таму. Да прыкладу, тут захоўваюцца “Маці Божая Адзігітрыя Бялыніцкая” сярэдзіны XVII стагоддзя, “Мадонна з дзіцём у вянку” канца XVII стагоддзя, “Хрышчэнне ў Іардане” першай чвэрці XIX стагоддзя.
Унікальны твор “Пакланенне Трох каралёў” — самы ранні з вядомых алтарных абразоў на Беларусі. Мяркуецца, што яго напісаў нямецкі мастак у 1514 годзе спецыяльна для касцёла ў Дрысвятах Браслаўскага раёна. У цэнтры іконы — барадаты Язэп і нябеснай прыгажосці Маці Божая, якая трымае маленькага Езуса. А асноўную частку пярэдняга плана займаюць постаці Трох каралёў, якія, кіруючыся святлом Бэтлеемскай зоркі, прыйшлі пакланіцца немаўляці. Постаці і прадметы вакол іх паказаны з максімальнай фактурнай, колеравай, матэрыяльнай праўдзівасцю. “Адраджэнне стварыла такі тып рэлігійнай карціны, які наблізіў падзеі свяшчэннай гісторыі да свету знаёмых і блізкіх чалавеку рэчаў, краявідаў, напаўняючы свет гэтых прадметаў новым узвышаным зместам, напаўняючы Боскасцю зямное жыццё”, — піша мастацтвазнаўца Аляксей Хадыка.
