За сваю гісторыю фестываль набыў папулярнасць не толькі на Брэстчыне. Слава пра мотальскіх майстрых і розную смакату, што ўмеюць гатаваць па старадаўніх рэцэптах, разляцелася далёка за межы Іванаўшчыны. Трапіць на гастрафэст мараць шматлікія вытворцы беларускіх тавараў. Таму, акрамя вялікай колькасці рамеснікаў, кулінараў і артыстаў, сёлета ў Моталь прыедуць прадстаўнікі звыш пяцідзесяці прадпрыемстваў. Арганізаты падкрэсліваюць: гэта не толькі даніна павагі да працы беларусаў, занятых на вытворчасці ўсіх неабходных у жыцці тавараў.
Як расказаў старшыня Мотальскага сельвыканкама Сяргей Піліповіч, летась у Іркуцку было падпісана пагадненне аб устанаўленні партнёрскіх адносін паміж Мотальскім сельскім Саветам і паселішчам Тургенеўка Баяндаеўскага раёна Іркуцкай вобласці. Нашы новыя пабрацімы маюць намер прыехаць на фестываль. Ва ўсякім разе, дамоўленасць аб гэтым ёсць, адзначыў Сяргей Піліповіч.
Праграма «Мотальскіх прысмакаў», як звычайна, цікавая і насычаная. Адбудзецца круглы стол «Нацыянальная кухня — ключ да дружбы народаў». Гасцей чакаюць кейтарынг па-мотальску, магчымасць пакаштаваць мясныя і рыбныя далікатэсы, стравы і напоі традыцыйнай кухні маталян. А назвы страў разнастайныя — «Бабэныкы», «Цыбрыкы капусны», «Шапэжкі», мяса «Сакавітае»… Большасць з гэтых кулінарных шэдэўраў можна будзе пакаштаваць у так званых мотальскіх дворыках, якія будуць сустракаць гасцей літаральна ля самага ўваходу на фестываль.
