Падведзены вынікі конкурсу сярод грамадскіх арганізацый суайчыннікаў за мяжой.
Гэты конкурс быў арганізаваны апаратам Упаўнаважанага па справах рэлігій і нацыянальнасцяў Савета Міністраў Рэспублікі Беларусь. Ён меў поспех і добры водгук сярод удзельнікаў. Суайчыннікі, якія пражываюць за мяжой, не раз прапаноўвалі прадоўжыць конкурс, што і было ўлічана пры падрыхтоўцы праекта Плана работы апарата Упаўнаважанага па справах рэлігій і нацыянальнасцяў на 2009 год.
Як паведаміў кансультант аддзела па справах нацыянальнасцяў і прававой работы апарата Упаўнаважанага Міхаіл Рыбакоў, многія рэгіёны Беларусі цяпер падтрымліваюць цесныя стасункі з арганізацыямі суайчыннікаў за мяжой. Тым, хто найбольш актыўна працуе ў гэтым кірунку, уручаны Падзячныя лісты.
Сярод тых, хто ўмее сябраваць — грамадскія арганізацыі суайчыннікаў за мяжой: Беларускі культурна-асветніцкі цэнтр у імя Святой Ефрасінні Полацкай (г. Новасібірск, Расія), Беларуская суполка Львоўскай вобласці (г. Львоў, Украіна), Беларускае культурнае таварыства “Ялінка” (г. Маарду, Эстонія), Беларуска-эстонскае культурнае таварыства “БЭЗ” (г. Йыхві, Эстонія), Беларускае культурна-асветніцкае таварыства “Уздым” (г. Даўгаўпілс, Латвія), Нацыянальна-культурная аўтаномія беларусаў г. Томска “Белыя Росы” (г. Томск, Расія), Нацыянальна-культурнае аб’яднанне грамадзян “Беларусь” (г. Белгарад-Днястроўскі, Украіна), Нацыянальна-культурны цэнтр беларусаў “Сябры” (г. Нальчык, Кабардзіна-Балкарская Рэспубліка, Расія), Таварыства беларускай культуры “Спадчына” (г. Друскінінкай, Літва), Аб’яднанне беларускіх грамадскіх арганізацый у Літве (г. Вільнюс, Літва), Рыжская асноўная беларуская школа (г. Рыга, Латвія).
Найбольш сістэмна, творча арганізавалі работу з суайчыннікамі за мяжой Мінскі гарадскі выканаўчы камітэт, а таксама Адміністрацыі Завадскога і Фрунзенскага раёнаў Мінска, гімназія з беларускай мовай навучання № 23 г. Мінска, Кобрынскі і Жабінкаўскі райвыканкамы Брэстчыны, Віцебскі аблвыканкам, а таксама Браслаўскі і Пастаўскі райвыканкамы Віцебшчыны, Гродзенскі гарвыканкам, Астравецкі і Слонімскі райвыканкамы Гродзеншчыны, Чачэрскі райвыканкам Гомельшчыны і Касцюковіцкі райвыканкам Магілёўшчыны.
“Конкурс сяброў” працягваецца. Больш падрабязна пра яго ўмовы ў хуткім часе можна будзе даведацца ў апараце Упаўнаважанага па справах рэлігій і нацыянальнасцяў.
Іван Іванаў
Стымул для сяброўства
Падведзены вынікі конкурсу сярод грамадскіх арганізацый суайчыннікаў за мяжой