Рэспубліканская навукова-пра-ктычная канферэнцыя “Аўтэнтычны фальклор, праблемы бытавання, вывучэння, пераймання” сабрала ў Мінску навукоўцаў ужо трэці раз, і па традыцыі адным з абавязковых пунктаў яе праграмы стаў этнаграфічны канцэрт “Фальклор беларускай глыбінкі”.
У гэтым годзе на сцэне залы Беларускага дзяржаўнага уні-версітэта культуры і мастацтваў гучалі песні Брэстчыны, узрост якіх вымяраецца сотнямі, а іншы раз і тысячамі гадоў, многія з іх былі складзены на Палессі яшчэ ў дахрысціянскія часы.
Джаз па-беларуску
Пяюць на Брэстчыне інакш, чым, напрыклад, на Віцебшчыне. Па словах прадстаўніцы аргкамітэта канферэнцыі, выкладчыцы Беларускага дзяржаўнага універсітэта культуры і мастацтваў Любові Сівуравай, спевы, што спакон вякоў бытуюць на Віцебшчыне, у краі азёр, выконваюцца высокімі, гучнымі галасамі — іх здалёк чуваць. На Брэстчыне прынята спяваць нізкімі, груднымі галасамі. Мабыць, справа ў тым, што балоты і векавечныя пушчы ствараюць уяўленне замкнёнай прасторы, камернасці.
Старажытныя палескія спевы — унісонныя, калі кожны з тых, хто пяе, выконвае сваю “партыю”. Як у джазавай традыцыі, кожны выканаўца імправізуе, не выходзячы за межы матыву песні. Таму выкананне песні заўсёды непаўторнае.
Старадаўнія спевы і музыка, як кажуць сёння вучоныя, нясуць у сабе нейкі гукавы код, закадзіраваныя сэнсы, якія моцна ўздзейнічаюць на падсвядомасць слухача, але толькі ў жывым выкананні. Закладзеная ў песні сіла, што прымушае зачаравана глядзець на маленькую бабулю ў даматканым адзенні, — гэтая сіла, на жаль, не перадаецца праз сродкі гуказапісу. Ды і моладзь, што выконвае аўтэнтычную музыку — тыя ж тэксты, той жа старажытны матыў — адзначае: не, ТАК не атрымліваецца. Не ўздзейнічае на слухачоў старадаўняя песня так, як у выкананні тых, хто атрымаў яе ў спадчыну па доўгім ланцугу продкаў, ад прадзедаў і прабабуль. Хто выхаваны ў той культуры, калі дзяўчынка з сямі гадоў вучылася прасці, ткаць і пець, слухаючы старэйшых і пераймаючы іх майстэрства. Людзі верылі: абрадавыя песні можна спяваць толькі ў абрадавыя дні. Купальскія на Купалле, пятроўскія на Пятра, зажыначныя — толькі зажынаючы першы сноп... А то загукаеш вясну зімой, і наступіць пацяпленне. Песням надаваўся магічны сэнс, лічылася, што яны, спетыя не ў пару, могуць нешта парушыць у прыродзе.
Спевы ў спадчыну
Выканаўцаў, што прыехалі ў Мінск, па сталічным рахунку было не шмат: 12 чалавек з Іванаўскага раёна, 17 — з Піншчыны. Але сапраўдныя аўтэнтычныя спевы і патрабуюць некаторай камернасці, іх складана перанесці на вялікія канцэртныя пляцоўкі, бо пяюцца яны без мікрафонаў і нярэдка нават без музыкальнага суправаджэння.
— Ансамбль наш — “Знаходка”. А гэта — Мікалай Каткавец, наш гарманіст, у 75-м годзе мы ансамбль з ім удваіх стварылі, — ахвотна расказвае Марыя Клімаўна Анізкавец з вёскі Тышкавічы. — Він на свадзьбе граў, на хрэсьбінах, знаў, якія жанчыны добра спяваюць. От мы пайшлі па хатах і такіх жанчын назбіралі. Ансамбль стварылі, каб не сумна было. Ужо нам па шэсцьдзесят сем, многа хто і старэйшыя, а як запяем — у нас душа радуецца!
— А як жа вы ў Мінск, у такую далячынь выбраліся?
— Мінск — ці ж гэта далёка? Мы і ў Маскве былі, і ў Германіі, і ў Польшчы выступалі.
— Даўно пяю, з 16 год, а зараз ужо 72, — распавядае Ганна Васільеўна Козел з вёскі Камень, удзельніца калектыву “Багатуха”. — Як я хораша спявала! Дочкі мае жывуць у Брэсце, умеюць пець, але не пяюць — не прынята ў горадзе.
— Чаго ж мужчын сярод выканаўцаў так мала?
— Паўміралі нашы мужчыны. А тыя, што засталіся, спяваць не хочуць — песні нашы не па прымушку.
— Песні нашы святыя, старадаўнія, — далучаецца да размовы Марыя Мікалаеўна Малашчук з вёскі Псышчава, удзельніца ансамбля “Жураўка”. — І мама мая іх пела, і бабуля. Памятаю, яшчэ як я маленькая была, маці спявала, калі збіралася на вячоркі ўзіму. І мы спявалі: лён трапалі, кудзелі пралі, каровы пасвілі — спявалі. А ўжо на вяселлі як спявалі! Пець умелі ўсе, і жанчыны, і мужчыны. Цяпер мне 78, а мае дзеці, унукі і праўнукі маіх песень знаці не хочуць. Моладзь прыедзе на выхадныя ў вёску, да і паедзе ў гарады. У дзярэўні не хоча моладзь заставацца — ні свіней корміці, ні карову даіці, ні песні спяваці...
Пагроза знікнення нематэрыяльнай спадчыны існуе ва ўсіх краінах свету. Каб сабраць яе, вывучыць і зберагчы для нашчадкаў, мала толькі намаганняў энтузіястаў. Беларусь стала 11-й дзяржавай у свеце і першай сярод краін СНД, што далучылася да Канвенцыі ЮНЕСКА “Аб захаванні нематэрыяльнай культурнай спадчыны”. У бліжэйшыя гады навукоўцамі будзе створаны спіс жывых абрадаў (што ўключаюць у сябе і абрадавыя песні), якія захаваліся да нашых часоў. Многія з іх атрымаюць статус гісторыка-культурнай каштоўнасці, бо для нацыянальнай культуры яны не меней вызначальныя, чым старажытныя архітэктурныя помнікі.
Старадаўняя магія песні
Тое, што сучасны гараджанін называе “фальклорнай музыкай”, настолькі блізка да сапраўднай, аўтэнтычнай народнай творчасці, як яблычны джэм у фабрычнай упакоўцы да яблыка на галінцы дзікай яблынькі. Няма ў народнай фальклорнай традыцыі ні даўганогіх белазубых дзяўчат з харэаграфічнымі, адшліфаванымі рухамі і прафесійна пастаўленымі галасамі, ні распрацаваных мадэльерамі касцюмаў, ні, зразумела, гукаўзмацняльнай апаратуры. Сярэдні ўзрост “артыстаў” — далёка за 50, гэта тыя, хто яшчэ памятае час, калі песня перадавалася ў спадчыну ад маці да дачкі, ад бацькі да сына і была неад’емнай часткай жыцця. А такіх людзей з кожным годам становіцца ўсё меней.