Сёння не абавязкова падцягваць твар — можна ўвесцi спецыяльныя нiткі, якiя «трымаюць» яго.Мы звярнуліся да загадчыка аддзела пластычнай і эстэтычнай хірургіі Клінічнага цэнтра пластычнай хірургіі і медыцынскай касметалогіі Сяргея Сербянкова з пытаннем, ці прыносяць беларусы партрэты Джолі і Клум з просьбай зрабіць іх твары менавіта такімі.
— Часам людзі імкнуцца зрабіць нос, як у Анджэліны Джолі, але так, каб прасілі перакроіць увесь твар, такога не было, — кажа Сяргей Сербянкоў. — На мой погляд, «раскрутка» пэўных вобразаў, хутчэй, маркетынгавы ход. Вы зразумейце, зрабіць твар, як у кагосьці, значыць правесці дзясяткі аперацый. Прычым гэта вельмі складаныя аперацыі на касцявым шкілеце. І ўсё роўна патрэбны эфект наўрад ці хто атрымае. Як бы хто ні супраціўляўся, але лепшы твар той, які падарыла прырода. У наш цэнтр, дарэчы, з «зорнымі» здымкамі прыходзяць вельмі рэдка, калі толькі моладзь. У асноўным пацыенты давяраюць доктару, плюс самі кажуць, што хацелі б атрымаць у выніку.
Цікава, а якія стандарты прыгажосці ў аматараў ін'екцыі. Алена Комлік, касметолаг, паказвае фатаграфіі дзвюх розных дзяўчат:
— Ёсць мода на два тыпажы. У першым выпадку цэніцца натуральная прыгажосць. У другім — нешта накшталт гламуру, такі вобраз вельмі запатрабаваны ў Маскве, правінцыяльных расійскіх гарадах. Такіх дзяўчат лёгка вылічыць па наступных прыкметах: доўгія валасы, маленькі носік, вялікія губы, загарэлая скура, вялікія вочы, грудзі пятага памеру. Магчыма, гэткі вобраз стане папулярны і сярод беларусак. Напрыклад, у мяне часта просяць зрабіць пухлыя вусны і прыкметныя скулы. Але мне больш падабаецца, калі ў жанчыны натуральная прыгажосць. Хоць, напрыклад, нядрэнна зрабіць твар больш вытанчаным і арыстакратычным, падцягнутым. Сёння не абавязкова падцягваць твар – можна ўвесці спецыяльныя ніткі. Яны, нібы каркас, «трымаюць» твар. З дапамогай ін'екцый можна нават пазбавіцца ад гарбінкі. Усе гэтыя навінкі толькі з'явіліся, але ўжо набіраюць папулярнасць.
Мілана МІЛЕЎСКАЯ
