Кіраўнік гэтага музычнага калектыву Мікалай Гром калісьці быў вядомым барабаншчыкам. Сярод яго вучняў, напрыклад, былы барабаншчык ансамбля “Песняры” Уладзімір Марусіч. Мікалай Фёдаравіч іграў на ўдарных гадоў васямнаццаць, выступаў на вяселлях і карпаратывах, пакуль жывы гук не замяніла электроніка.
А вось спяваў ён заўсёды. У слуцкім Доме культуры ён працуе з салістамі “каму за 30”. Яны прыходзяць да яго з вуліцы. Гром падбірае ім рэпертуар, вобраз, і хутка малавядомыя жыхары Слуцка ператвараюцца ў мясцовых артыстаў.
Дзесяць гадоў таму ў Мікалая Фёдаравіча з’явілася новае захапленне. Неяк убачыў па тэлебачанні выступленне з папуры расійскай шоу-групы “Доктар Ватсан” і прапанаваў калегам з Дома культуры стварыць нешта падобнае. Так з’явіўся слуцкі калектыў “Лабірынт”. Пяцёра мужчын у неверагодных касцюмах, напрыклад у гальштуках і камізэльках на голае цела, абыгрываюць на сцэне смешныя сітуацыі, аб’ядноўваючы ў сваіх выступленнях урыўкі з папулярных песень.
— Папуры не распаўсю-джана ў нас у краіне, — расказвае Мікалай Гром. — Наш “Лабірынт” першым адкрыў яго ў Беларусі. Хтосьці спрабуе паўтарыць, але, як правіла, артысты проста злучаюць урыўкі розных папулярных матываў. Мы ж на сцэне ператвараемся ў акцёраў. Напэўна, таму збіраем поўныя залы гледачоў.
Калектыў выступае ў Слуцку, Барысаве, Маладзечне, Салігорску, Мінску... У яго скарбонцы сем сольных канцэртаў, у тым ліку і ў Маскве. У “Лабірынта” вялікі рэпертуар: папуры любоўныя, антыалкагольныя, кіна- і рэтрапапуры. Сюжэт прыдумваем самі. Як прызнаюцца ўдзельнікі, галоўнае ў гэтай справе — знайсці актуальную тэму, на якую ўжо напісана шмат песень.
Акрамя папуры слуцкі калектыў выступае і з сур’ёзнымі творамі. Напрыклад, на апошнім рэспубліканскім фестывалі народнай творчасці “Напеў зямлі маёй” у Мар’інай Горцы “Лабірынт” выканаў аўтарскую песню “Квітней, Беларусь”. Выступленне суправаджалася відэа з дэманстрацыяй маляўнічых месцаў Беларусі... А самі артысты былі апрануты ў нязвыклыя для іх калектыву строгія упрыгожаныя ціснёным серабром касцюмы, пашытыя па заказу аддзела культуры Слуцкага райвыканкама. Адзін такі касцюм каштаваў мільён беларускіх рублёў! Вынік выступлення — 3-е месца і камп’ютар у падарунак. Дарэчы, званне народнага “Лабірынт” атрымаў параўнальна нядаўна — гэтай вясной, да дзесяцігадовага юбілею калектыву.
