Вігілійную вячэру, за якой збяруцца сёння каталіцкія сем’і, часта называюць куццёй — у гонар асноўнай стравы, якая падаецца ў гэты дзень. Але куцця гатуецца не толькі на Божае Нараджэнне. Згодна з народнай традыцыяй, гэта абрадавая страва павінна прысутнічаць на стале таксама на Шчодры вечар і перад Вадохрышчам. Прычым лічыцца, што на кожную з гэтых трох вячэр (Посную, Багатую і Вадзяную куцці) кашу трэба варыць у адным і тым жа гаршку і з аднолькавай колькасці круп.
Традыцыйна куццю варылі з ячных або пшанічных круп. Але сёння дазваляецца выкарыстоўваць і рыс. Гатуюць куццю з дабаўленнем мёду, разынак, арэхаў, цукатаў, маку. Ёсць звычай, які, дарэчы, ад беларусаў перанялі суседзі на поўначы і захадзе: падаваць куццю з макавым малаком. Дзеля яго прыгатавання трэба ўзяць 400 г маку, заліць яго некалькі разоў кіпенем, а пасля перамалоць у ступе або сучасным кухонным камбайне, пакуль макавая маса не набудзе крыху белаваты колер ад соку. Пасля мак неабходна заліць кіпенем (1,5 л), дадаць мёд або цукар (0,5 шклянкі) і пакінуць у халодным месцы.
mila@sb.by
