Аграрыі ААТ «Капыльскае» прыступілі да ўборкі цукровых буракоў аднымі з першых ў раёне
Намеснік кіраўніка сельгаспрадпрыемства па раслінаводстве Уладзімір МАЦЭЛЯ адзначыў высокую цукрыстасць караняплодаў.
У гаспадарцы ўжо прывыклі да высокіх ураджаяў гэтай культуры. Але сёлета надвор’е не зусім спрыяла яе росту, таму караняплодам так і не давялося набраць яшчэ большую вагу. Аб гэтым сведчаць першыя ўчасткі, дзе збіраюць па 370—400 цэнтнераў на круг (гатунак «нэнсі»). Плануецца лепшая ўраджайнасць такіх гатункаў, як «мандарын» і «вентура» — каля 500 цэнтнераў. Пабываўшы на гэтым полі, нават візуальна можна было вызначыць, што буракі тут урадзілі лепш.
У сельгаспрадпрыемстве ўборка ідзе як заўсёды аператыўна: караняплоды загружаюцца прама ў кузавы грузавікоў. Практычна праз 15—20 хвілін да камбайна Аляксандра Гарашчэні і Уладзіміра Лявара пад’язджае другі аўтамабіль. Па 1000 тон у дзень 
збіраюць вопытныя механізатары. Перапынак удзельнікі ўборкі робяць практычна толькі на абед, які дастаўляецца непасрэдна да месца працы.
Сяргей ЛАЗОЎСКІ
НА ЗДЫМКУ: Аляксандр ГАРАШЧЭНЯ, Уладзімір ЛЯВАР.
Фота аўтара
