У выдавецтве «Беларуская Энцыклапедыя імя Петруся Броўкі» выйшлі апошнія кнігі шматтомнага выдання «Гарады і вёскі».
Завяршылі праект выданне, прысвечанае Пастаўскаму, Полацкаму, Расонскаму, Сенненскаму раёнам, і кніга, у якой расказваецца пра населеныя пункты Талачынскага, Ушацкага, Чашніцкага, Шаркаўшчынскага і Шумілінскага раёнаў. Як паведамляе bel-en.by, гэта раёны з багатай гісторыяй і вялікай колькасцю вёсак і хутароў. Кожная кніга змяшчае каля 3 тысяч артыкулаў, над якімі працавалі навуковыя супрацоўнікі Цэнтра даследаванняў беларускай культуры, мовы і літаратуры, а таксама Інстытута гісторыі НАН Беларусі. Падрыхтаваныя імі артыкулы — вынік іх шматгадовай працы ў бібліятэках і архівах Беларусі, Расіі, Літвы, Польшчы і Украіны. Акрамя таго, пры падрыхтоўцы кніг выкарыстаны матэрыялы мясцовых краязнаўцаў. У падборы ілюстрацый — праект змяшчае шмат каляровых і чорна-белых здымкаў, малюнкаў, карт — дапамагалі раённыя выканаўчыя камітэты Віцебскай вобласці і рэдакцыі мясцовых газет.
