"...I не трачу я надзеi, бо — вясёлы, гумарыст"
У адным са сваіх вершаў пра сябе вядомы беларускі сатырык Мікола Вяршынін піша:
...Мо такі ў мяне
быў продак,
Гены я яго нашу?
Ёсць супроцьатрутны
сродак,
Бо сатыру я пішу.
Маю светлыя ідэі,
А душа – як чысты ліст.
І не трачу я надзеі,
Бо – вясёлы, гумарыст.
Відаць, таму самы любімы літаратурны жанр Міколы Пятровіча — гумар і сатыра. Невыпадкова і найбольшы поспех ён займеў менавіта ў ім. З-пад вясёлага і вострага пяра пісьменніка выйшлі ў свет звыш дзесятка зборнікаў гумарыстычных твораў. А нядаўна пад назвай “Дакрытыкаваўся” Мікола Вяршынін выдаў і важкі томік выбранага, дзе сабраны лепшыя, напісаныя апошнім часам і на працягу дзесяцігоддзяў, байкі, фельетоны, гумарэскі, каламбуры, мініяцюры, сатырычныя паэмы і мемуары. Асобным раздзелам — “Пра тых, каго я паважаю і люблю” – выдзелены эпіграмы, прысвечаныя таварышам па пяру, беларускім пісьменнікам. Прапануем чытачам “Р” некалькі з іх.
Уладзімір Гніламёдаў
Уладзімір Гніламёдаў
Не рабіў нікому шкоды.
Ведае літаратуру,
Сам спакойны па натуры.
І разважлівы заўжды,
Крытыкне, дык – “не бяды”.
Алесь Пісьмянкоў
Алесь вядомы Пісьмянкоў
Напіша ўсё без лішніх слоў,
Разважыць, што і да чаго,
Усё атрымаецца ў яго.
Іван
Шамякін
Наш настаўнік, слаўны мэтр,
А раманаў – кіламетр.
І аповесці, эсэ –
Пра жыццё народа ўсе.
Пладавіты – слоў няма!
Быццам Аляксандр Дзюма.
Уладзімір
Ліпскі
Арганізатар ён прыродны
І не разгубіцца нідзе.
Кіруе сам Дзіцячым фондам,
“Вясёлку” доўга ён вядзе.
Фальклор спазнаў з усіх бакоў
І “нарадзіў” жа “Аўцюкоў”!
Віктар
Гардзей
Паважаны наш Гардзей,
Падаеш нам шмат надзей.
Не адыдзеш ад падзей,
Ну, другі, як ты, — дык дзе?
Папулярны між людзей.
Сам спакойны – не рахманы,
І не церпіш ты падману,
Так паэзіі адданы!