Усе аддзяленні памежнага кантролю Брэсцкай памежнай групы, за выключэннем грузавога пункта пропуска “Казловічы”, перайшлі на работу па прынцыпе “аднаго прыпынку”. Асноўная мэта новаўвядзення, як паведамілі ў прэс-цэнтры Дзяржаўнага памежнага камітэта, — скараціць час на афармленне дакументаў і забяспечыць максімальную камфортнасць для грамадзян, якія перасякаюць дзяржаўную мяжу Беларусі. Цяпер для асоб, якія рухаюцца па “зялёным канале”, час на афармленне дакументаў скарочаны з трох хвілін да адной.Засноўваючыся на новых правілах, пасажыры, прыбыўшы ў зону памежнага і мытнага кантролю на “зялёны канал”, цяпер не пакідаюць транспартны сродак. Прадстаўнік памежнай службы сам падыходзіць да грамадзян і ажыццяўляе пашпартны кантроль.
Старшыня Дзяржаўнага памежнага камітэта Беларусі генерал-маёр Ігар Рачкоўскі асабіста наведаў міжнародны аўтадарожны пункт пропуску “Брэст” і праверыў дзеянне прынцыпу “аднаго прыпынку”. Пасля рэканструкцыі праектная прапускная здольнасць пункта пропуску “Брэст” складае больш за дзве тысячы легкавых аўтамашын, 200 аўтобусаў і 12 тысяч чалавек за суткі.
Алена Цімафеева
