Прэм’еры лета

Прэм’еры лета
У праграме тэлеканалаў «Беларусь 1» і «Беларусь 2» — новыя рэаліці-шоу і серыял. Што прапануюць паглядзець?

Пад падазрэннем кожны

12-серыйны псіхалагічны дэтэктыў «Навучы мяне жыць» стартаваў на канале «Беларусь 1». Фільм выходзіць на экран па буднях у 10.50 і ў 18.35. Гэта — сапраўдны дэтэктыў з усімі яго атрыбутамі. Гісторыя прымушае гледача ўключыцца ў расследаванне, разважаць разам з героямі і суперажываць ім.


На дзіцячай пляцоўцы знойдзены труп жанчыны, апранутай па модзе 1970-х, з залітымі фарбай вачыма і абрыўкам газеты ў роце. Характар ​​забойства наводзіць на думку аб з’яўленні ў горадзе маньяка. Да расследавання падключаецца прафесійны псіхіятр, які ў мінулым дапамагаў раскрываць серыйныя забойствы. Аднак спецыяліст сам знаходзіцца ў цяжкай жыццёвай сітуацыі, не можа зладзіць з вядучым следчым па справе, а ў давяршэнне да ўсяго адзін з падазроных — яго пацыент. Група працуе ў атмасферы недаверу і ўсеагульнай падазронасці, невінаватым не можа лічыцца ніхто.

У галоўнай ролі ўрача-псіхіятра Ільі Лаўрова — Кірыл Кяро, які стаў папулярным і па-сапраўднаму любімым пасля серыяла «Нюхач». У пошуках свайго новага персанажу ён шмат працаваў з кансультантамі-псіхіятрамі і нават паспрабаваў на сабе гіпноз. Гаворыць, зразумеў, што ў акцёраў і псіхіятраў ёсць штосьці падобнае — яны ідуць у прафесію, каб, перш за ўсё, пазнаць сябе.

Насуперак традыцыі, калі дзеянне ў падобных фільмах адбываецца ў халодным горадзе, дзе золка і пахмурна, стваральнікі карціны размясцілі змрочную гісторыю пра маньяка-забойцу ў дэкарацыі сонечнага прыморскага курортнага гарадка. Немагчыма нават уявіць, што там могуць здарацца жудасныя рэчы. Яшчэ адна цікавая знаходка — удзел у запісе саўндтрэка да серыяла Гарыка Сукачова.

Не гіблае месца

За акном лета і доўгачаканая пара ад­пачынкаў. А значыць, прыйшоў час разабрацца з нядбайнымі ўладальнікамі гасцініц, якія не могуць навесці парадак у сваёй гаспадарцы, і дапамагчы ім выправіць становішча. Павышае ўзровень сэрвісу і гасціннасці Дзмітрый Макараў у шоу «На нажах. Атэлі», яго выпускі выходзяць на «Беларусь 2» па серадах у 13.00 і па нядзелях у 9.50.


Дзмітрый — сапраўдны прафесіянал з вялікім вопытам работы ў сферы абслугоўвання. Ён здольны нават самы жудасны атэль ператварыць у гасцініцу вышэйшага класа, якая будзе радаваць сваіх наведвальнікаў якасным сэрвісам і ўтульнымі нумарамі.

Макараў, як ніхто, ведае, як зрабіць так, каб кліенты засталіся задаволеныя. Ён дасведчаны знаўца з цудоўным пачуццём стылю і здолее змяніць любы хостэл або дом адпачынку. Галоўнае, каб гаспадары самі хацелі перамен. Кожны новы выпуск «На нажах. Атэлі» — гэта асобная гісторыя пра тое, як нават самае гіблае месца можна змяніць да непазнавальнасці, калі выконваць рэкамендацыі і парады вядучага перадачы.

Спытайце Жанну

Ці можна назаўжды пазбавіцца ад няўпэўненасці ў сабе і стаць па-сапраўднаму шчаслівай? Вядома, так! Тэлевядучая Жанна Бадоева бярэ курс на пераўтварэнне і аб’яўляе час перамен. Яна прыйдзе на дапамогу дзяўчатам, якія саромеюцца сваёй знешнасці і аддаюць перавагу інтэрнэт-знаёмствам замест спатканняў у рэальнасці. Жанна пераканае іх забыцца пра комплексы і адправіць гераінь у рукі топавых стылістаў, лепшых візажыстаў і бьюці-віртуозаў, каб кожная дзяўчына стала той, каго мужчыны праводзяць поглядам.


Гераінь праекта чакаюць карысныя парады па стылі, рэкамендацыі па мэйк-апу і галоўнае — рамантычная сустрэча з мужчынам мары!

Хочаце быць паспяховымі і прывабнымі? Звяртайцеся да Жанны на «Беларусь 2». Рэаліці-шоу «ЖаннаПамажы» ў эфіры па чацвяргах у 13.20 і па суботах у 9.45.

Ірына ЮР’ЕВА.

Новости