Мастакі з розных краін на Міжнародным пленэры ў Магілёўскай вобласці кожны па-свойму адлюстроўвалі вобраз РадзімыСёлетні міжнародны пленэр па жывапісе “Вобраз Радзімы ў выяўленчым мастацтве” прысвячаўся 140-м угодкам народнага мастака Расіі і Беларусі Вітольда Бялыніцкага-Бірулі. Творчыя сустрэчы ладзіліся ў розных маляўнічых куточках Магілёўскай вобласці. І паўсюдна мастакі з Украіны, Арменіі, Казахстана, Кітая, Ізраіля, Расіі і Беларусі імкнуліся знайсці ў тамтэйшых краявідах знаёмыя вобразы. Так, па словах аднаго з удзельнікаў пленэру, армянскага мастака Георгія Бабаханяна, яго вельмі ўразілі разнастайнасць і прыгажосць беларускіх пейзажаў. “З самага пачатку творчага эксперыменту ў галаве было мноства ідэй, як адлюстраваць свае эмоцыі на палатне, — прызнаецца творца. — І ў маіх работах атрымалася своеасаблівае спалучэнне яркіх сонечных фарбаў, што пераважаюць на радзіме ў Арменіі, і выдатных беларускіх пейзажаў”.
Пад час плэнеру мастакі паспелі папрацаваць і ў расійскім Паленаве. Намеснік дырэктара Магілёўскага абласнога мастацкага музея імя Паўла Масленнікава Святлана Строгіна адзначае: “У нас склалася добрая традыцыя — ездзіць на эцюды ў Дзяржаўны музей-запаведнік Васіля Паленава ў Тульскую вобласць. Сёлета паездка доўжылася два тыдні”. Пасля магіляўчане прымалі гасцей у сябе. На гэты раз майстры пэндзля тварылі ў вёсцы Крынкі ля Бялынічаў, дзе з’явіўся на свет Вітольд Бялыніцкі-Біруля, і ў вёсцы Лыскаўшчына Круглянскага раёна. Менавіта там правёў апошнія гады жыцця рускі мастак Мікалай Неўраў.
А яшчэ мастакі адлюстравалі на палотнах сённяшнія краявіды паблізу вёскі Лясная на Слаўгарадчыне, дзе ў 1708 годзе войскі Пятра I змагаліся са шведамі, капліцу ля вёскі Салтанаўка Магілёўскага раёна, усталяваную на месцы бітвы ў ліпені 1812-га рускай арміі з французамі. Творцы наведалі і філіял Літаратурнага музея Янкі Купалы, што на беразе Дняпра ў вёсцы Ляўкі Аршанскага раёна. Дарэчы, дачу ў Ляўках пісьменнік асабліва любіў. Прыязджаў туды кожны год ранняй вясной і заставаўся да позняй восені. Там яму добра пісалася. Замежным мастакам таксама лёгка працавалася на Магілёўшчыне. Многія казалі, што ехалі сюды па натхненне — і не расчараваліся.Дарэчы, на выставе, што адкрылася пасля пленэру ў Магілёўскім мастацкім музеі імя Паўла Масленнікава, прадстаўлены выніковыя работы творцаў. Многія з тых прац, між іншым, застануцца ў музеі назаўжды.
Кацярына Аляксандрава
