На гэтым чыгуначным пераездзе інтэнсіўны рух.
На чыгуначным пераездзе на вуліцы Амельянюка ў Дзяржынску рух інтэнсіўны: цягнікі бягуць з Мінска ў Брэст і назад, аўтамабілі могуць выехаць праз яго на трасу М-1. Шлагбаумам пераезд не абсталяваны, затое маюцца папераджальныя знакі і святлогукавая сігналізацыя.
— Распаўсюджаныя парушэнні правілаў пераезду чыгункі? Абгон на пераездах і на адлегласці менш за 50 метраў ад іх, а таксама невыкананне патрабаванняў дарожнага знака, — пералічвае Аляксей Панчанка, старшы дзяржаўтаінспектар ДАІ Дзяржынскага раёна. — Бачыце чырвоны знак «Стоп»? Перад ім абавязкова трэба спыніцца і яшчэ раз упэўніцца, што не набліжаецца цягнік.
Не паспяваем мы прыпаркавацца так, каб бачыць пераезд, як прыгожая «Кіа» ластаўкай пералятае пуці не толькі без прыпынку, але і пад сігналізацыю. Кідаемся ў пагоню. На патрабаванне спыніцца машына паслухмяна туліцца да абочыны. Адчыняюцца вадзіцельскія дзверцы, і мы бачым не маладога ліхача, а прыемную даму бальзакаўскага ўзросту.
— Ой, ну, калі ласка, не штрафуйце мяне, я больш не буду, я выпраўлюся, — пачынае яна. — Разумееце, форс-мажорныя абставіны, я спазняюся, начальнік злуецца…
Інспектар, які прызвычаіўся да розных тлумачэнняў, моўчкі запаўняе пратакол. Тады дама пераходзіць у наступленне:
— А ў вас дзе-небудзь зафіксавана маё парушэнне? Вось у мяне відэарэгістратар ёсць! Давайце паглядзім! Так, не прыпынілася перад пераездам, а сігналізацыя ўжо потым зазвінела!
Азнаёміцца з яе запісамі так і не атрымалася: аўталэдзі не здолела справіцца з гаджэтам. Інспектар назіраў за ёй з цікавасцю, але не дапамагаў: бывала, грамадзяне потым сцвярджалі, быццам супрацоўнікі ДАІ сціралі запісы, якія супярэчылі іх пазіцыі. Рабіць няма чаго: дама атрымлівае штраф у памеры дзвюх базавых велічынь.
Вадзіцель Land Rover так спяшаўся на паляванне, што забыў спыніцца перад пераездам. Фота аўтара.
Тым часам на чыгуначнае палатно нават без намёку на прыпынак выскаквае Land Rover Discovery. За рулём дзядзька сярэдніх гадоў. Ён ахвотна прызнае, што парушыў правілы, і нават весяліцца з гэтай нагоды — маўляў, як у маладосць вярнуўся!
— А дысконту ў вас няма? — жартуе парушальнік.
Пакуль інспектар афармляе пратакол, вадзіцель расказвае, што едзе на паляванне, і паказвае фатаграфіі свайго ката, які прывольна раскінуўся на воўчай скуры. Разлічыцца зараз можна на месцы карткай — інспектар мае пры сабе тэрмінал. Парушальнік ахвотна карыстаецца гэтай паслугай і едзе далей па сваіх паляўнічых справах.
Не спыняецца перад рэйкамі і чарговы вадзіцель. Яго шкада: чалавек едзе ад стаматолага і ўвогуле мала што цяміць. На пратакол і штраф рэагуе вельмі стрымана — яму не да нас. Лепш у такім стане ўвогуле за руль не садзіцца…
«Задумаўся», «вельмі спяшаюся», «самі мы не мясцовыя…» — за дзве гадзіны, што мы правялі каля пераезда, давялося пачуць самыя розныя апраўданні. Але, па-першае, закон адзіны для ўсіх. А па-другое… Наўрад ці яны ўразяць шматтонную махіну цягніка, пад які можа трапіць аўтамабіль няўважлівага вадзіцеля.
nevmer@mail.ru
