«Беларусь патрабуе перамен. Альтэрнатыва ёсць!»
Дарагiя беларусы!
Мне 32 гады, нарадзiлася ў Мiнску ў сям’i працоўных, маю дзве адукацыi — юрыдычную i эканамiчную. Скончыла Акадэмiю Мiнiстэрства ўнутраных спраў. Па поглядах — хрысцiянская дэмакратка.
Працавала выкладчыкам у iнстытуце «Кадры iндустрыi», спецыялiстам аддзела жыллёвай палiтыкi адмiнiстрацыi Савецкага раёна, юрыстам. Зараз працую галоўным бухгалтарам.
Чаму я балатуюся ў дэпутаты?
Я ўдзельнiчаю ў гэтай кампанii, каб нарэшце ў нашай краiне распачалiся перамены, каб нашы дзецi i нашы бацькi маглi жыць годна. Няма дзяржаўных грошаў — ёсць грошы народныя. Мяне не задавальняе, калi нашы падаткi iдуць на падарункi i спецбальнiцы для чыноўнiкаў. Нядаўна ў Мiнску пабудавалi новую рэзiдэнцыю — а сродкаў на перавод Мiнска на чыстую ваду не знайшлi!
Зараз я разам з iншымi хрысцiянскiмi дэмакратамi змагаюся за абмежаванне рэкламы алкаголю i чыстую ваду для ўсiх жыхароў Мiнска.
Як вывесцi эканомiку з крызiсу?
Хрысцiянскiя дэмакраты ўжо прымусiлi ўладу змянiць заканадаўства. Нашы кампанii падтрымалi дзясяткi тысяч людзей. Намi падрыхтаваны законапраекты i канцэпцыi па рэфармаванню эканомiкi, аховы здароўя, ЖКГ, адукацыi i пенсiйнай сiстэмы.
Хрысцiянскiя дэмакраты за ЭКАНАМIЧНЫЯ РЭФОРМЫ:
Прыцягненне сродкаў эмiгрантаў i замежных iнвестараў у новыя сектары эканомiкi (IТ–iндустрыя). Продаж стратных прадпрыемстваў iнвестарам для мадэрнiзацыi вытворчасцяў.
Развiццё малога i сярэдняга бiзнесу (адмена сертыфiкатаў, iснуючых штрафаў i праверак; гадавыя патэнты; найм работнiкаў без абмежаванняў).
Мiнiмальная падатковая нагрузка на бiзнес i адмена датацый дзяржсектару, развiццё фермерскiх гаспадарак за кошт увядзення прыватнай уласнасцi на зямлю для грамадзян Беларусi.
Хрысцiянскiя дэмакраты за перамены ў ЖЫЛЛЁВА–КАМУНАЛЬНАЙ ГАСПАДАРЦЫ:
Магчымасць выбару памiж прыватнай або дзяржаўнай арганiзацыяй, якая абслугоўвае дом. Канкурэнцыя знiзiць кошт i павысiць якасць абслугоўвання.
Скарачэнне чыноўнiкаў у аддзелах ЖКГ i ў мiнiстэрстве.
Хрысцiянскiя дэмакраты за рэформу АХОВЫ ЗДАРОЎЯ:
Страхавая медыцына: дзяржава i прадпрыемствы размяшчаюць на рахунак кожнага грамадзянiна страхавую суму, а чалавек самастойна абiрае доктара i аплачвае яго паслугi са свайго рахунку.
Адмена платных паслуг у дзяржаўных установах аховы здароўя. Развiццё прыватных медыцынскiх цэнтраў.
Павелiчэнне выдаткаў на мэдыцыну за кошт адлiчэнняў у фонд абавязковага медыцынскага страхавання сродкаў ад абароту спiртных напояў i тытунёвых вырабаў.
Хрысцiянскiя дэмакраты за годныя ПЕНСII для кожнага:
Увядзенне абавязковых накапляльных пенсiй. Кожны ўласнiк сродкаў у накапляльным фондзе самастойна распараджаецца сваiмi накапленнямi.
Перадача ў накапляльны фонд 25% сродкаў ад прыватызацыi. Старэйшае пакаленне мае права на сваю долю ў створаным iх рукамi нацыянальным багаццi краiны.
Аднолькавы ўзрост выхаду i пенсiйных выплат для чыноўнiкаў i настаўнiкаў, рабочых i сiлавiкоў.
У мяне ёсць мара.
Я мару жыць у вольнай Беларусi.
У Беларусi са свабоднымi i сумленнымi выбарамi.
У Беларусi, дзе ўлада — гэта народ.
У Беларусi са справядлiвымi судамi, з беларускай мовай у дзiцячых садках, школах i ўнiверсiтэтах.
У краiне, дзе чуеш дзiцячы смех i ведаеш, што нашы дзецi змогуць стаць паспяховымi тут.
У краiне, дзе нашы бацькi змогуць жыць годна на пенсii i вандраваць па свеце.
Кожны дзень я раблю крок да гэтай мары i ведаю, што большасць з вас таксама марыць аб такой Беларусi.
Звяртаюся да ўсiх — хопiць марыць пра гэта на канапе цi на кухнi. Мы — моцная нацыя! Мы павiнны паверыць у свае сiлы. Мы павiнны стаць гаспадарамi на сваёй зямлi. Зараз мы ствараем партыю «Беларуская хрысцiянская дэмакратыя». Далучайцеся да нас, i мы будзем крочыць да гэтай мары разам!
Кантактны тэл. (8–029) 167–34–35, bchd.info@gmail.com
Хрысцiянская дэмакратыя з’яўляецца аўтаномным ад царквы палiтычным рухам, якi выступае за вырашэнне сацыяльных i эканамiчных праблем на аснове хрысцiянскiх прынцыпаў.
Советская Белоруссия № 170 (25052). Вторник, 6 сентября 2016