15 гадоў як у Малдове дзейнічае беларуская суполка.
Свята праводзілася ў Кішынёве, у Доме нацыянальнасцяў. Там, дарэчы, ужо шмат гадоў арганізуюць свае мерапрыемствы прадстаўнікі розных нацыянальных меншасцяў. На гэты раз маладыя хлопцы і дзяўчаты віталі гасцей у беларускіх нацыянальных строях, гучалі народныя песні, можна было паглядзець слайды і фатаграфіі з жыцця суполкі, утворанай 15 гадоў таму.
Павіншаваць юбіляраў завіталі прадстаўнікі іншых нацыянальных суполак: рускай, украінскай, літоўскай, эстонскай, азербайджанскай. Пра справы, якімі напоўнена жыццё беларусаў Малдовы, расказаў старшыня суполкі Іван Кец.
Прагучала і вітальнае слова Надзвычайнага і Паўнамоцнага Пасла Рэспублікі Беларусь у Рэспубліцы Малдова Уладзіміра Саковіча. Выступілі таксама прадстаўнікі Бюро міжэтнічных адносін і Парламента Малдовы, старшыні беларускіх суполак з Ціраспаля і Бендэр. Урачыстая частка мерапрыемства закончылася прыёмам у суполку новых членаў.
Да юбілею была прымеркавана прэзентацыя кнігі “Беларускія крыніцы Малдовы” — яе прадставіў рэдактар і выдавецкі калектыў. Потым адбыўся канцэрт з удзелам вядомых у Малдове артыстаў, ансамбля “Канчэрціна”, прадстаўнікоў культурнага цэнтра “Полі Арт”.
Упрыгожыла прастору свята і выстава карцін мастака, члена суполкі Вячаслава Ігнаценкі — у экспазіцыі былі прадстаўлены краявіды з беларускай глыбінкі, якія нагадалі ўсім пра родную Беларусь.
У завяршэнне вечарыны гаспадары свята прапанавалі гасцям адведаць смачныя стравы, згатаваныя членамі суполкі па традыцыйных рэцэптах беларускай кухні.
Мсціслаў Ігнаценка
Пара сталасці і плёну
15 гадоў як у Малдове дзейнічае беларуская суполка