Ні адна экскурсія ў Беларускім дзяржаўным музеі гісторыі Вялікай Айчыннай вайны не абыходзіцца без узгадвання Сталінградскай бітвы. Гэта яна паказала ўсяму свету прыклад найвышэйшага гераізму і самаахвярнасці савецкіх воінаў. У чым жа навізна часовай экспазіцыі «Сталінград 1942—1943. Беларусы на абароне горада»? Упершыню жыхары і госці сталіцы маюць магчымасць убачыць унікальныя музейныя прадметы і фотадакументальны матэрыял са збору музея-запаведніка «Сталінградская бітва». Выстава падрыхтавана яго супрацоўнікамі пры падтрымцы Валгаградскага рэгіянальнага аддзялення Расійскага ваенна-гістарычнага таварыства.
Беларускі дзяржаўны музей гісторыі Вялікай Айчыннай вайны запрашае бліжэй пазнаёміцца з гісторыяй Сталінградскай бітвы.Гісторыя Сталінградскай бітвы ў экспазіцыі, паведамляе warmuseum.by, раскрываецца праз лёсы нашых землякоў, беларусаў і ўраджэнцаў рэспублікі. Кожны яе раздзел прысвечаны пэўнаму этапу бітвы на Волзе — цяжкім баям на далёкіх і блізкіх подступах да Сталінграда, бяспрыкладнаму па напале супрацьстаянню на яго вуліцах, падзеям гераічнага наступлення нашых войскаў. Асобны раздзел расказвае пра ўдзельнікаў бітвы на Волзе, якія прымалі ўдзел у вызваленні Беларусі ў 1944 годзе. У экспазіцыі прадстаўлены дакументы, фотаздымкі, асабістыя рэчы, узоры ўзбраення і абмундзіравання, мемуарная літаратура, плакаты ваеннага часу. Пазнаёміцца з унікальнымі экспанатамі можна да 21 снежня.
mila@sb.by
Фото БЕЛТА
