Падвалы палаца Тызенгаўзаў, у якім цяпер знаходзіцца Пастаўская раённая бальніца, стануць яшчэ адной цікавай рысай помніка архітэктуры.Падзямеллі, а гэта вялікая сетка хадоў і пераходаў, тут працягнуліся на дзесяткі кіламетраў. Гісторыкі і археолагі ўжо закончылі іх даследаванне, і ў бліжэйшы час пачнецца рэканструкцыя. Праект рэстаўрацыі палаца і яго падземнай часткі мяркуецца ажыццявіць да 2015 года.
У старажытных падвалах размесцяцца экспазіцыі, прысвечаныя вядомаму роду, гісторыі палаца і саміх Пастаў. Невялікая частка падвала ўжо пераабсталявана пад кафэ, якое карыстаецца папулярнасцю ў турыстаў. Палац Тызенгаўзаў быў пабудаваны ў канцы ХVІІІ стагоддзя.
Тут жыў вядомы арнітолаг Канстанцін Тызенгаўз — аўтар многіх навуковых работ, адна з якіх — “Усеагульная арніталогія, ці Апісанне птушак усіх частак свету”. У сваім маёнтку ён арганізаваў арніталагічны музей, у палацы працавала выязная кафедра Віленскага універсітэта.
Сёння палацава-паркавы ансамбль — славутасць Пастаў, ён уключаны ў экскурсійны маршрут па раёне. Толькі летась палац наведалі больш за 10 тысяч турыстаў.
Дарэчы, за захаванне помніка гісторыі Пастаўская цэнтральная раённая бальніца атрымала грант ЮНЕСКА.
Дзіяна Грышанава
