Дэлегацыя Брэсцкай вобласці прадставіла рэгіён у кітайскай правінцыі Хубэй.
Галоўным вынікам рабочага візіту дэлегацыі пад кіраўніцтвам губернатара Брэстчыны Канстанціна Сумара стала падпісанне плана супрацоўніцтва паміж Брэсцкім аблвыканкамам і Народным урадам правінцыі Хубэй. Дакумент, зацверджаны ў час сустрэчы з губернатарам кітайскага рэгіёна Ван Гашэнам, утрымлівае рашэнне аб актывізацыі ў 2014—2020 гадах сумеснай работы ў гандлёва-эканамічнай, навукова-тэхнічнай і культурнай сферах.
У час візіту дэлегацыя наведала сталіцу правінцыі горад Ухань, дзе азнаёмілася з работай адміністрацыйнага цэнтра для жыхароў «Адно акно», свабоднай эканамічнай зоны «Дунсіху» і малочнага завода. Таксама кіраўнікі Брэстчыны пабывалі на прадпрыемстве па вытворчасці напояў і чаю ў горадзе Чыбі і ў свабоднай эканамічнай зоне, дзе працуе сумесны беларуска-кітайскі завод «Саньцзян-Волат Ко., Лтд». Менавіта тут дэлегацыя падпісала яшчэ адзін важны для Брэста дакумент — пагадненне аб далейшым развіцці партнёрскіх зносін з горадам Сяагань.
Як паведамілі ў Брэсцкім аблвыканкаме, яшчэ аднім вынікам рабочага візіту сталі дамоўленасці аб магчымасці паставак у КНР тавараў, якія выпускаюць прадпрыемствы вобласці.
