Каля адноўленай святыні прайшла першая служба.
Алтар, створаны ў стылі позняга барока і ўпрыгожаны шматлікімі калонамі і пілястрамі, моцна пацярпеў ад пажару ў 2006 годзе. Агонь найбольш пашкодзіў чатыры драўляныя скульптуры (усяго іх 20): мецэната касцёла Самуіла Лазовы, святога Амброзія, апосталаў Якава і Фамы. Складанасць рэстаўрацыйных работ заключалася ў тым, што старадаўнія чарцяжы алтара былі даўно страчаны, а аднаўляць прыйшлося фігуры апосталаў вышынёй у чалавечы рост! Працавалі па старых фотаздымках.
Навуковым кіраўніком аднаўленчых работ выступіў вядомы польскі спецыяліст, галоўны рэстаўратар Каралеўскага замка ў Варшаве Павел Садлей, а рэзчыкамі — Казімір Місюра і яго сын Ігар з гарадскога пасёлка Воранава. Майстры працавалі над скульптурамі чатыры гады. Сёлета рэзчыкі закончылі працу над апошняй фігурай — святога Амброзія. Яна і завяршыла кампазіцыю галоўнага алтара гродзенскай святыні. Каб алтар поўнасцю набыў першапачатковы выгляд, засталося яшчэ пакрыць некаторыя элементы сусальным золатам. Плануецца, такі падарунак рэстаўратары зробяць для гродзенскіх прыхаджан ужо да Вялікадня.