Вясновы настрой
Напрыклад, дзяўчаты з Кіраўска сукенкі ўпрыгожылі рознакаляровымі «бурбалкамі». Гэтую яркую калекцыю так і назвалі — «Вясёлкавыя мары». А іх аднагодкі з Быхава змаглі павярнуць час назад сваёй «Стужкай часу»: малюнкі вежы на спадніцах нагадалі аб мінулым роднага горада, яго прыгажосці. Трымалі фасон таксама модніцы з Глуска і Мсціслава, Бабруйска і Дрыбіна, Крычава і Чэрыкава. А хоцімскія дзяўчаты на сцэну выйшлі не толькі ў спадніцах з матывамі свайго раёна і краіны, а і з караваем у руках! Старшыня журы, намеснік дырэктара цэнтра творчасці Вольга Марозава лічыць, што такія святы даюць вялікі імпульс да развіцця таленту:
—Школьнікі вучацца браць ад моды ўсё лепшае, увасабляць свае праекты. А яшчэ — разумеюць, што за кожным дасягненнем стаіць карпатлівая праца.
Галоўнае — каб касцюмчык быў да твару
Эльвіра Пярэдня, адна з кіраўнікоў студыі юнага мадэльера Кіраўска «Жамчужына», не скрывае: дзяўчаткі ахвотна вучацца валодаць наж-ніцамі, гнаць радкі на швейнай машынцы. І з не меншай радасцю дэманструюць свае творы на сцэне. Дзевяцікласніца Яўгенія Котава, напрыклад, прыйшла ў калектыў чатыры гады таму. За гэты час асвоіла асновы візажу, парыкмахерскай справы. І канечне, крою і шыцця. Хваляванне перад дэфіле, кажа, ёсць. Аднак і пачуццё радасці, гонару ад апладысментаў і прызнання гледачоў — таксама.
Ацэньвалі калекцыі маленькіх куцюр’е ў намінацыях «Этнастыль», «Гарадскія матывы» і «Авангардныя ідэі». У дзвюх першых лепшымі сталі кіраўчане. А ў трэцяй — п’едэстал падзялілі з мадэльерамі магілёўскага цэнтра творчасці «Эверэст». Журы, дарэчы, ацэньвала строі не толькі па знешнім выглядзе, крэатыве і перадавых ідэях. Была дадзена адзнака і швейнаму майстэрству. Аднак не так важна, дыплом якой ступені атрымалі ўдзельнікі. Больш каштоўна, што майстры працавалі з натхненнем, змаглі заснаваць уласны стыль. А яшчэ атрымалі карысныя навыкі. І кім бы яны ні сталі ў будучым, талент бачыць і ствараць прыгажосць абавязкова будзе запатрабаваны. Бо яе, прыгажосці, шмат не бывае.
Svet.markova@gmail.com
Фота аўтара і Таццяны Вайцянковай