Як выглядаў галоўны беларускі горад пасля вайны і ў што ператварыўся з гадамі, выдатна паказвае кніга «Мінск: з руін да росквіту» прафесійнага гісторыка і экскурсавода Івана Сацукевіча, якая ўбачыла свет у выдавецтве «Беларуская Энцыклапедыя імя Петруся Броўкі». Кніга падрыхтавана на аснове супастаўлення эксклюзіўных пасляваенных фота- і відэаматэрыялаў Беларускага дзяржаўнага архіва кінафотафонадакументаў і кадраў нашага часу. Адна з асаблівасцей выдання — чытач мае магчымасць убачыць відэаздымку пасляваеннага Мінска з дапамогай QR-кодаў, якія знаходзяцца ў кнізе, і свайго смартфона.
«Выгляд на Дом урада скрозь руіны спаленых 1- і 2-павярховых будынкаў, якія знаходзіліся ў квартале насупраць. Сам Дом урада, у якім у гады акупацыі размяшчаліся нацысцкія чыгуначныя ўстановы, паштамт і штаб тылу групы армій «Цэнтр», толькі цудам захаваўся — нашы сапёры знайшлі ў яго падвалах дзясяткі авіябомб. Немцы рыхтавалі падрыў будынкаў перад сваім адступленнем, але па невядомай прычыне яго не здзейснілі».
Выдаўцы спадзяюцца, што кніга стане выдатным падарункам як самім беларусам, так і гасцям з-за мяжы. Дзякуючы сваёй універсальнасці яна будзе карысная дзецям сярэдняга і старэйшага школьнага ўзросту як памочнік у вывучэнні гісторыі сталіцы Беларусі.
mila@sb.by
