Учора пачаўся першы ў краіне электронны кірмаш вакансій.
Электронны кірмаш вакансій працягнецца да заўтрашняга дня ўключна. Усе тры дні мерапрыемства праходзіць з 10.00 да 16.00. Каб прыняць удзел у інавацыйным кірмашы, трэба скарыстацца электроннай паслугай на сайце http://e-vacancy.by. Пакуль што свае вакансіі — а іх 369 — прадставілі пяць арганізацый Мінска: ААТ «Авіякампанія «Белавія», дзяржпрадпрыемства «Мінскі метрапалітэн», ААТ «Кіруючая кампанія холдынга «Мінскі маторны завод», ААТ «МЗКР» і Мінскае гарадское ўпраўленне МНС. Працу прапануюць самую розную: у праватнасці, камандзір паветранага судна — інструктар, спецыяліст па знешнеэканамічнай дзейнасці, інжынер, кіроўца аўтамабіля, ратавальнік-пажарны, аператар станкоў з праграмным кіраваннем, тунэльны рабочы, машыніст электрацягніка, слесар па рамонце рухомага саставу, слесар-электрык. Зарплата — ад 190 да 12 000 рублёў.
Каб прыняць удзел у інавацыйным кірмашы, трэба скарыстацца электроннай паслугай на сайце http://e-vacancy.by
Выбіраючы вакансію, можна адразу азнаёміцца з патрабаваннямі да кандыдатаў, якія вылучае наймальнік. Так, напрыклад, каб стаць спецыялістам «Белавія», неабходна наяўнасць дыплома аб вышэйшай адукацыі. Далей сайт прапаноўвае два варыянты: адправіць рэзюмэ або пракансультавацца з наймальнікам анлайн. Для зручнасці ўдзельнікаў кірмашу тут жа ёсць шаблоны для рэзюмэ, якія можна скапіраваць і запоўніць. Паслуга электроннай кансультацыі дае магчымасць перайсці ў чат з наймальнікам і задаць яму любыя пытанні па прапанове. Каб не гартаць усе 10 старонак вакансій, можна адсартаваць іх: выбраць памер зарплаты, рэгіён або ўпісаць патрэбную прафесію. Пасля заканчэння кірмашу ўсё яшчэ актуальныя прапановы аўтаматычна трапяць у базу даных на партале службы занятасці.
— У першым пробным электронным кірмашы ўдзельнічаюць арганізацыі, якія маюць вялікую колькасць вакансій, прывабных і запатрабаваных на рынку працы. Спецыялісты кадравых службаў адгукнуліся на наш інавацыйны праект, гатовы папрацаваць у новым фармаце. У далейшым удзельнікам можа стаць любое прадпрыемства: трэба толькі зарэгістравацца праз партал службы занятасці і падаць свае вакансіі. Можна нават пры наяўнасці вялікай колькасці вакансій ініцыіраваць электронны кірмаш для канкрэтнага прадпрыемства. Ужо бачым водгук ад арганізацый: сёння адно прадпрыемства выказала жаданне далучыцца да кірмашу, — расказвае Святлана Лявончык, начальнік аддзела рынку працы ўпраўлення занятасці насельніцтва камітэта па працы, занятасцi i сацыяльнай абароне Мінгарвыканкама.
Патрабаванні да кандыдатаў вылучае наймальнік. Так, напрыклад, каб стаць спецыялістам «Белавія», неабходна наяўнасць дыплома аб вышэйшай адукацыі.
Больш за ўсё вакансій сёння прапануе дзяржпрадпрыемства «Мінскі метрапалітэн». На пытанні саіскальнікаў працы адказвае намеснік начальніка аддзела кадраў дзяржаўнага прадпрыемства «Мінскі метрапалітэн» Святлана Астапчук, дадае прэс-сакратар Мінскага метрапалітэна Андрэй Дроб:
— Яна будзе разглядаць рэзюмэ і адказваць на пытанні. На электронны кірмаш вакансій метрапалітэн прадставіў 215 свабодных працоўных месцаў.
У далейшым у залежнасці ад актыўнасці саіскальнікаў, магчыма, на сувязі будуць некалькі спецыялістаў арганізацый-удзельнікаў. Новая форма работы пакуль знаходзіцца ў стадыі апрабацыі — сістэма будзе дапрацоўвацца і ўдасканальвацца, падкрэслівае Святлана Лявончык:
— Для чаго такі новы фармат патрэбны? Мы лічым, што гэта больш сучасная форма работы, якая дазваляе паскорыць пошук працы без удзелу дадатковых пасрэднікаў. Наколькі часта будзем праводзіць такія мерапрыемствы ў далейшым — пакажа пробны кірмаш. Усё залежыць ад зацікаўленасці саіскальнікаў, важная зваротная сувязь. Але гарадскія кірмашы вакансій такая форма не заменіць. Электронныя і стандартныя кірмашы вакансій будуць дапаўняць адзін аднаго. Усё-такі не ўсе саіскальнікі працы, асабліва пажылыя грамадзяне, разбіраюцца ў камп’ютарных тэхналогіях.
matuzova@sb.by
