Пасля адкрыцця Нацыянальнай экспазіцыі Беларусі, дзе прадстаўлены вядучыя прадпрыемствы краіны, намеснік Прэм’ер-міністра Васіль Мацюшэўскі сустрэўся са старшынёй Знешэканамбанка Расіі Сяргеем Гарковым. У выніку яны падпісалі мемарандум аб супрацоўніцтве паміж нашым Урадам i расійскай дзяржкарпарацыяй. Акрамя таго, быў заключаны дагавор аб умовах выдачы крэдытаў для набыцця ў Расіі тавараў, вырабленых у Беларусі. Як чакаецца, гэта павялічыць продаж нашай прадукцыі на рынку ўсходніх суседзяў.
Далей на форуме стала вядома аб магчымасці стварэння некалькіх новых зон свабоднага гандлю ЕАЭС з іншымі краінамі. Так часовае пагадненне паміж саюзам і Іранам можа быць падпісана да канца года.
— Часовае пагадненне аб зоне свабоднага гандлю ахоплівае не ўвесь гандаль, а толькі абмежаваную частку таварнай наменклатуры, якая ўяўляе найбольшую экспартную цікавасць для бакоў, — патлумачыла міністр па гандлі ЕЭК Вераніка Нікішына. — У выпадку калі краіны ЕАЭС і Іран палічаць прэферэнцыйны гандаль эфектыўным, у далейшым магчымы пераход да паўнавартаснай зоны свабоднага гандлю.
Наша экспазiцыя адкрылася на Пецярбургскiм Мiжнародным эканамiчным форуме.Паводле ацэнак экспертаў, пры пераходзе да свабоднага гандлю паміж ЕАЭС і Іранам агульныя аб’ёмы экспарту дзяржаў саюза могуць вырасці на 73%. Гаворка ідзе пра пастаўкі медыкаментаў, паперы, адзення, металу, электрычнага абсталявання, аўтамабіляў. Зараз узаемны тавараабарот толькі трохі перавышае 3 мільярды долараў.
Праз пару тыдняў стане вядома і пра перспектывы стварэння зоны свабоднага гандлю паміж Еўразійскім эканамічным саюзам і Сінгапурам. Сумесная даследчая група ўжо завяршае работу над дакладам. Па словах Веранікі Нікішынай, «гэтыя высновы дазволяць весці больш прадметную размову аб падпісанні пагаднення». Яна нагадала, што Сінгапур з’яўляецца адной з вядучых эканомік свету, адным з галоўных сусветных партоў і лагістычных хабаў:
— Супрацоўніцтва з ім дазволіць дзяржавам — членам ЕАЭС прыкметна павысіць экспартныя патокі. Акрамя таго, узаемадзеянне з Сінгапурам дасць магчымасць краінам ЕАЭС наладзіць гандаль з усімі членамі Асацыяцыі дзяржаў Паўднёва-Усходняй Азіі (АСЕАН).
Сам жа Еўразійскі эканамічны саюз пакуль што збіраецца працаваць над праграмай развіцця лічбавай эканомікі. Умоўна яе называюць «план ГОЭЛРО-2». Тыгран Саркісян заклікаў усіх членаў саюза актывізавацца:
— Сёння ідзе дыскусія аб мадэлі эканамічнага росту, але відавочна, што патрэбна праграма электранізацыі. З дапамогай лічбы мы можам ажыццявіць сур’ёзны прарыў і мадэрнізацыю нашага саюза.
Да лістапада гэтага года плануецца прадставіць асноўныя тэзісы новага плана ГОЭЛРО-2. Важна, каб атрымалася «сфарміраваць узгоднены лічбавы парадак дня» для ўсіх краін-удзельніц, паколькі цяпер кожная дзяржава саюза рухаецца ў гэтым кірунку з рознай хуткасцю.
Скажам, Цэнтрабанк Расіі ўжо збіраецца распрацоўваць нацыянальную крыптавалюту, гэта значыць аналаг біткоінаў. Намеснік старшыні Банка Расіі Вольга Скарабагатава паведамiла: рэгулятары ўсіх краін прыйшлі да думкі, што нацыянальную віртуальную валюту рабіць трэба, гэта будучыня. Пытанне канкрэтнага часу і сталасці кожная краіна будзе вырашаць самастойна.
Больш узгодненасці пакуль у сельскай гаспадарцы. Краіны ЕАЭС сумесна з Еўразійскай эканамічнай камісіяй вызначыліся з адзінай стратэгіяй развіцця гэтай галіны. У аснове дакумента — інавацыйныя падыходы з разлікам на далейшае ўмацаванне харчовай бяспекі, а ў сярэднетэрміновай перспектыве — больш поўнае імпартазамяшчэнне, выпуск высокатэхналагічнай прадукцыі і павелічэнне аб’ёмаў экспарту.
— Тэма інавацыйнага развіцця аграпрамысловага комплексу актуальная для ўсіх краін ЕАЭС, — аргументаваў важнасць стратэгіі міністр па прамысловасці і аграпрамысловым комплексе ЕЭК Сяргей Сідорскі. — І ў немалой ступені гэта звязана з тым, што сёння дзяржавы-члены залежаць ад імпарту высокатэхналагічных сродкаў вытворчасці, насення, кармоў, генетычнага матэрыялу. На нашу думку, гэтую сітуацыю можна кардынальна змяніць ужо ў бліжэйшыя пяць гадоў.
Таму, на думку Сяргея Сідорскага, важным напрамкам сельскагаспадарчай стратэгіі саюза з’яўляецца фарміраванне эфектыўных механізмаў навукова-інавацыйнага ўзаемадзеяння паміж краінамі. ЕЭК ужо зацвердзіла пералік з 14 прыярытэтных для супрацоўніцтва тэм, уключаючы генетыку, селекцыю, аквакультуры, ветэрынарыю, тэхналогіі глыбокай перапрацоўкі.
