Нездарма кажуць: камусьці суп рэдкі, а камусьці і жэмчуг дробны. Нобелеўскі камітэт пакуль не змог дамагчыся ад Боба Дылана адэкватнай рэакцыі на прэмію па літаратуры. Невядома, ці прыедзе ён на цырымонію ўзнагароджання, якая адбудзецца 10 снежня ў Стакгольме.
Вядома, што Дылан не ўдзельнічае ў публічных раўтах, адмаўляе фатографам у здымках на яго канцэртах і вельмі рэдка дае інтэрв’ю. На канцэрце, які музыкант даў на наступны дзень пасля аб’яўлення яго лаўрэатам Нобелеўскай прэміі, ён і словам не абмовіўся пра гэта, затое ўпершыню за апошнія гады выканаў песню Like a Rolling Stone. Што зробіш, у знакамітасцяў свае дзівацтвы.
Хто мог прадбачыць, што кумір амерыканскіх хіпі праз 50 гадоў будзе ўганараваны Нобелеўскай прэміяй па літаратуры? І абыдзе такіх “канкурэнтаў”, як сірыйска-лівійскі паэт Адоніс, нарвежскі драматург Юн Фосэ, японскі пісьменнік і перакладчык Харукі Муракамі. Затое не трэба доўга тлумачыць, хто гэта такі. Часопіс Rolling Stone называе Дылана другім па значнасці пасля The Beatles выканаўцам у гісторыі музыкі. На рахунку музыканта больш за 50 альбомаў, 11 прэмій “Грэмі”, па статуэтцы “Залатога Глобуса” і “Оскара” за кампазіцыю Things Have Changed і Пулітцэраўская прэмія за ўплыў на поп-музыку і амерыканскую культуру.
Крытычных стрэл выпушчана шмат — і ў бок самога Дылана, і ў бок Нобелеўскага камітэта. Многім такое рашэнне дагэтуль не дае спакою. Спевака называюць “звычайным бардам, якіх навалам”, “паэтам без кніг”. Тым не менш нобелеўскія эксперты аддалі свае галасы менавіта за яго з фармулёўкай “за стварэнне новых паэтычных выразаў у вялікай амерыканскай песеннай традыцыі”. І нават параўналі Дылана з вялікімі Гамерам і Сафоклам. Музыка і паэзія і сёння цесна звязаны.
Да таго ж тэксты Боба Дылана ў поўнай меры адпавядаюць завяшчаным Альфрэдам Нобелем прынцыпам адлюстравання ў творчасці “чалавечых ідэалаў”. Яго песні Blowin in the Wind, The Times They Are a-Changi, Knockin on Heaven’s Door, напісаныя ў 1960-я гады, сталі гімнамі амерыканскага антываеннага руху і руху за грамадзянскія правы. У метафарах Дылана многія знаходзяць адказы на самыя складаныя пытанні. Яго песні пераспявалі, здаецца, усе сусветна вядомыя выканаўцы. Не разумееце англійскую мову? Вось вам добры стымул вывучаць яе.