За год было выдадзена больш за дзевяцьсот найменняў беларускамоўных кніг.
Паводле перапісу 2009 года, роднай беларускую мову лічаць 60 працэнтаў жыхароў нашай краіны — крыху больш за пяць мільёнаў, аднак звычайна размаўляюць на ёй дома толькі 30 працэнтаў насельніцтва, а ў якасці гутарковай выкарыстоўваюць усяго 23 працэнты.
Вядома, дзяржава стараецца павялічыць гэту лічбу, падахвочваючы грамадства размаўляць і чытаць па-беларуску. Так, напрыклад, летась было выдадзена 940 найменняў беларускамоўных кніг і брашур агульным тыражом амаль 3 мільёны экзэмпляраў. А ўжо ў сакавіку ў тэставым рэжыме будзе запушчаны цалкам беларускамоўны канал “Беларусь 3”.
Акцыі, якія ўчора, у Дзень роднай мовы, прайшлі па ўсёй краіне, таксама мелі на мэце пашырыць выкарыстанне беларускай мовы ў штодзённым жыцці. У сталіцы, напрыклад, была прэзентавана імпрэза “Матчын дарунак ад самай калыскі”, прысвечаная Якубу Коласу. Распачаўся першы этап грамадска-культурнай акцыі “Чытаем Купалу разам”. Брэстаўчане змаглі пазнаёміцца з творамі Купалы, Гарэцкага, Караткевіча і Быкава, урыўкі з якіх чыталі ў грамадскім транспарце. А наведвальнікі Браслаўскай цэнтральнай бібліятэкі сталі ўдзельнікамі флэшмобу “Сёння размаўляем па-беларуску”.
