Сёння на Міншчыне вызначаць лепшага маладога дырэктара ўстановы агульнай сярэдняй адукацыі.
Гэта цікавае спаборніцтва маладых кіраўнікоў ладзяць Мінскі абласны інстытут развіцця адукацыі і ўпраўленне адукацыі аблвыканкама. Зараз фінал, у яго прайшлі 19 перспектыўных дырэктараў, якія маюць стаж на пасадзе ад двух да пяці гадоў, валодаюць добрымі арганізатарскімі здольнасцямі, накіраванымі на поспех і далейшае развіццё. На першым, завочным, этапе спаборніцтва канкурсанты прадставілі на суд журы свае эсэ, якія мелі аднолькавую лаканічную назву — «Я — дырэктар», але паказалі вельмі розныя і арыгінальныя сэнсавыя падыходы. А вось на другім, вочным, іх чакае куды больш складанае выпрабаванне, якое поўнасцю выключае суб’ектыўны фактар у адзнаках. Гэта тэсціраванне, якое выявіць узровень навукова-метадычнай і псіхалагічнай падрыхтоўкі. Таксама ўдзельнікі конкурсу пакажуць сябе ў аратарскім майстэрстве. Прычым тэму для публічнага выступлення даведаюцца толькі за паўгадзіны да яго. Пераможцы атрымаюць узнагароды.