Лета заканчваецца. Яно праляцела гэтак хутка, як заўсёды. І вось ужо дарослыя выходзяць з адпачынкаў на працу, а дзеці адпраўляюцца ў школу. Што яны думаюць напярэдадні? Якія пачуцці ў іх выклікае Дзень ведаў? Што яны чакаюць ад новага навучальнага года? На ўсе гэтыя пытанні можна адказаць, а можна і намаляваць!
Гродзенскі дзіцячы хоспіс сумесна з сацыяльным аддзелам Гродзенскай епархіі Беларускай праваслаўнай царквы, Гродзенскім дзяржаўным універсітэтам імя Янкі Купалы і цэнтрам творчасці дзяцей і моладзі напярэдадні 1 верасня ладзяць акцыю “Малюем веды!” Яе мэта — прыцягнуць увагу грамадскасці да праблем дзяцей з абмежаванымі магчымасцямі і асаблівасцямі фізічнага і псіхічнага стану здароўя. Яна адбудзецца 30 жніўня ў 12 гадзін у гарадскім парку імя Жылібера. Дзецям прапануюць караоке-клуб, малюнак на мальберце, лепку з салёнага цеста, ролевыя гульні. Акрамя таго, удзельнікаў акцыі чакае тэатралізаванае прадстаўленне, гульні з клоунамі і казачнымі героямі, а таксама падарункі.
