Сёння многія тэатры арганізоўваюць для гледачоў трансляцыі спектакляў у інтэрнэце і на тэлебачанні, адкрываюць доступы да архіўных запісаў. Змаглі ўпэўніцца ў гэтым і нашы чытачы. Тэатральны анлайн-марафон выдавецкага дома «Беларусь сегодня» #БеларусьБЕЗcovid толькі за першы тыдзень сабраў больш за 3,1 млн праглядаў. Адметна, што трансляцыі спектакляў з розных тэатраў краіны на сайце sb.by і ў сацсетках медыяхолдынгу ідуць не ў запісе, а ў рэжыме рэальнага часу.
У суботу, 18 красавіка, адбылася прэм'ера праекта — гледачы ўбачылі фільм-оперу «Альпійская балада» па аднайменнай аповесці Васіля Быкава. Опера была напісана ў 1985 годзе на лібрэта Марыны Чаркашынай-Губарэнка, у 1986 годзе яе ўпершыню прадставілі на тэатральнай на сцэне. А ў 1987-м на Беларускім тэлебачанні стварылі аднайменны фільм-оперу, у якім прынялі ўдзел салісты Дзяржаўнага акадэмічнага Вялікага тэатра оперы і балета Беларусі Наталля Руднева (Джулія) і Уладзімір Экнадзіёсаў (Іван). Опера, паведамляе bolshoibelarus.by, прысвечана падзеям Вялікай Айчыннай вайны і расказвае пра лёсы і каханне двух беглякоў з фашысцкага канцлагера — беларуса Івана і італьянкі Джуліі.
— Не сумняваемся, што наша новая сумесная акцыя будзе пазітыўна ўспрынята вялікай аўдыторыяй, для якой трансляцыі спектакляў у інтэрнэце — лепшы спосаб застацца на сувязі з мастацтвам, — разважаюць ініцыятары праекта. — Мы можам натхніць нашых суайчыннікаў і гледачоў усяго свету, прадставіўшы ім архіўныя запісы легендарных спектакляў Вялікага тэатра Беларусі, якія па праву ўваходзяць у залаты фонд Беларускага тэлебачання.
Плануецца, на сувязі з мастацтвам у такім фармаце можна будзе заставацца некалькі месяцаў. Запісаў хопіць надоўга. Белтэлерадыёкампанія здымала і трансліравала рэпертуарныя спектаклі Вялікага тэатра Беларусі на працягу многіх гадоў. У фондах захоўваецца больш за 30 балетаў і больш за 40 опер. Сярод іх «Баль-маскарад», «Багема», «Дзікае паляванне караля Стаха» і іншыя.
mila@sb.by
