Спявачка нарадзілася ў Мінску. З адзнакай скончыла Мінскае музычнае вучылішча імя М.І. Глінкі па спецыяльнасці «Музыказнаўства», затым Санкт-Пецярбургскую дзяржаўную кансерваторыю імя М.А. Рымскага-Корсакава. У 2012-м стала салісткай Пермскага акадэ-мічнага тэатра оперы і балета імя П.І. Чайкоўскага.
У апошнія гады часта радавала спявачка сваімі выступленнямі і беларусаў. Публіка з нецярпеннем чакала яе ў Белдзяржфілармоніі і Вялікім тэатры Беларусі. Надзея прымала ўдзел у гала-канцэртах зорак калядных оперных форумаў, а таксама ў спектаклях тэатра.
Відавочна, што цяпер яе выступленні на радзіме стануць яшчэ больш частымі. З 1 красавіка Надзея Кучар — салістка оперы Вялікага тэатра. Упершыню ў новым статусе спявачка выступіць 9 красавіка. Яна выйдзе на сцэну беларускага тэатра ў вобразе Віялеты Валеры ў оперы «Травіята». Як паведамляе прэс-служба Вялікага тэатра, галоўныя партыі ў гэты вечар выканаюць таксама ўладальнікі медаля Францыска Скарыны, лаўрэаты міжнародных конкурсаў Юрый Гарадзецкі (Альфрэд) і Ілля Сільчукоў (Жэрмон).
mila@sb.by
Фото bolshoibelarus.by
