Леа можа стаць... ільвянём
Навіна пра тое, што ўладальнікам беларускай кампаніі Masquerade Technologies стаў Марк Цукерберг, ператварылася ў сенсацыю. Бо бізнесмен укладвае грошы толькі ў мегапаспяховыя праекты. Цану трымаюць у сакрэце, але лік ідзе прыкладна на 100-150 мільёнаў долараў.
— Дзякуй усім, хто павіншаваў каманду MSQRD. Абсалютна бліскучы цім. Зоркі! — напісаў на сваёй старонцы ў Фэйсбуку беларускі IТ-гуру Юрый Гурскі, які падтрымаў маладых распрацоўшчыкаў.
— Ім па 23-24 гады, і я гатовы ставіць каньяк скрынямі, што гэта не апошняя навіна пра хлопцаў.
Рашэнне мільярдэра набыць фірму зразумелае. Таленавітыя праграмісты не толькі прыдумалі ўнікальную новую тэхналогію, але і стварылі дадатак, які ў кароткія тэрміны набраў шалёную папулярнасць.
З’явіўся MSQRD усяго чатыры месяцы назад. Цяпер яго запампавалі больш за 15 мільёнаў разоў. У хуткім часе можна смела чакаць яшчэ большага росту папулярнасці: на днях дадатак стаў даступны не толькі на iOS, але і на Android.
У “Маскарадзе” 50 масак. Акрамя жывёл, ёсць твары Леанарда Ды Капрыа, Джоні Дэпа, Дональда Трампа і, вядома, знакамітая маланка Дэвіда Боўі. Проста запускаеш, глядзіш у камеру — і цябе грыміруюць у рэжыме анлайн. Кожная маска ідэальна кладзецца на твар і паўтарае міміку. У вобразе можна зрабіць сэлфі, запісаць відэа для сяброў і закінуць усё ў сацсетку або проста захаваць сабе на памяць.
Сярод карыстальнікаў шмат знакамітасцяў. Нават маці акцёра Леанарда Ды Капрыа прымерыла маску з тварам сына і двума “Оскарамі”.
Masquerade Technologies заснавалі Яўген Няўгень (злева), Сяргей Ганчар (на пярэднім плане) і Яўген Зацяпякін у 2015 годзе. Першая рэальная версія дадатку MSQRD была зроблена за 48 гадзін. Яўген Няўгень таксама з’яўляецца заснавальнікам стартапа SplitMetrics (Maps.me) і крэатыўным дырэктарам дабрачыннага аўкцыёну сустрэч “МаеСэнс”. Фота: источник
Стартап за два дні
Дзіўна: першую версію распрацоўшчыкі стварылі ўсяго за двое сутак. Тады было толькі восем эфектаў: вусы, маска тыгра, маска малпы… Такога поспеху не чакалі. Хлопцы запэўніваюць: на піяр не патрацілі ні капейкі. Заснавальнік Яўген Няўгень гаворыць, што спачатку навінку тэставалі сябры:
— Усе былі ў захапленні, пыталіся, дзе запампаваць. І мы выпусцілі дадатак напярэдадні Раства. Галоўнае, відэа і фота з нашай праграмы сталі з’яўляцца ў медыяперсон. Першым “вывеў у свет” дадатак вядомы рэпер Баста. “Запосціў” у Інстаграме відэа ў вобразе зайчыка. Былы саліст групы “Чай удвух” Стас Касцюшкін прымераў на сябе твар барадатай Канчыты Вурст. І панеслася!
Бэтман ды іншыя
— У зусім маладых самы папулярны персанаж Сталін, — гаворыць Яўген Няўгень. — Але, мяркуючы па ўсім, у гэтай масцы для жартаўнікоў уся фішка ў вусах, а не ў палітычнай персоне. Бо многія нават і не ведаюць, хто гэта!
Фанаты закідалі распрацоўшчыкаў просьбамі: просяць зрабіць маскі Бэтмена, Джокера, Халка ды іншых кінагерояў.
— Будучыня стасункаў — за відэачатамі, — упэўнены Яўген. — Але ў адрозненне ад тэкставых паведамленняў, дзе нормай сталі смайлікі і стыкеры, у відэасувязі не было магчымасці такой пазітыўнай рэакцыі на суразмоўцу. Гэты прабел мы і запоўнілі. Мэта наступнай версіі — каб любы карыстальнік ствараў свае маскі. У Бразіліі свае персанажы, у Японіі — свае, і ў нас будзе вялікі каталог.
ДАВЕДКА
World of tanks, Viber... Хто наступны?
Аляксей ЛЯШЧОЎ, намеснік дэкана факультэта камп’ютарных сістэм і сетак Беларускага дзяржаўнага ўніверсітэта інфарматыкі і радыёэлектронікі:
— Беларусь — краіна з інтэлектуальным рэсурсам. І ён актыўна праяўляецца ў папулярнай і прыбытковай IT-сферы. Але аднаго рэсурсу мала, важна стварыць умовы для яго развіцця. Дзяржава “ўкладваецца” ў чалавечы рэсурс: для школьнікаў праводзяцца розныя алімпіяды, IT-турніры. Вышэйшая адукацыя — профільная, і вельмі якасную адукацыю дае Беларускі дзяржаўны ўніверсітэт інфарматыкі і радыёэлектронікі — выпускае запатрабаваных спецыялістаў IT-сферы. Для працвітання праграмістаў у Беларусі робіцца нямала. Да прыкладу, Парк высокіх тэхналогій стрымлівае адток кадраў за мяжу. Таленавітыя маладыя людзі атрымліваюць добрую зарплату, часта выязджаюць у камандзіроўкі за мяжу і выпускаюць прадукты, якія становяцца вядомымі ва ўсім свеце. Беларуская анлайн-гульня World of Tanks, месенджар Viber, дадатак “Маскарад” гэта пацвярджаюць. І яны — не апошнія.
Крысціна Хілько
