Вучні Прылуцкай сярэдняй школы атрымалі да Новага года камп’ютары.
Са святам iх павіншавала намеснік кіраўніка спраў Прэзідэнта Беларусі Надзея Каткавец.
Для дзяцей падрыхтавалі шмат падарункаў. Дашкольнікам і вучням малодшых класаў уручылі маляўнічыя наборы фламастараў, размалёвак і пазлаў. Сюрпрызы чакалі і старшакласнікаў: яны атрымалі новыя камп’ютары. Не абышлося свята і без аднаго з сімвалаў Новага года — мандарынаў, якiя госцi прывезлi ў вялiкiх кошыках.
— Акцыя «Нашы дзеці» — вельмі яркая падзея ў чарадзе ўсіх мерапрыемстваў, якія паказваюць сацыяльную накіраванасць нашай дзяржавы і сацыяльную палітыку Прэзідэнта, — гаворыць Надзея Каткавец. — Будуць з’едзены цукеркі, спішуцца фламастары, але ў дзіцячых душах назаўжды застанецца пачуццё свята.
А сёння выхаванцы Андрэеўскага дзіцячага дома чакаюць гасцей з Міністэрства абароны Беларусі. Супрацоўнікі Міністэрства сельскай гаспадаркі і харчавання краіны павіншуюць хлопчыкаў і дзяўчынак з Бабруйскага дзіцячага дома № 1. А ў Васілішкаўскі дом-інтэрнат для дзяцей-інвалідаў з асаблівасцямі псіхафізічнага развіцця прыедзе дэлегацыя з Міністэрства працы і сацыяльнай абароны рэспублікі.
Акцыя «Нашы дзеці» накіравана на тое, каб аказаць дапамогу і падтрымку дзецям, якія апынуліся ў складанай жыццёвай сітуацыі і маюць патрэбу ў асаблівай увазе дзяржавы і грамадства. У гэтым годзе яна пройдзе ў нашай краіне па 10 студзеня.
