Філіпінка Муція Датул ведае, куды патраціць прызавыя грошы
Пераможца міжнароднага конкурсу прыгажосці «Miss Supranational-2013» філіпінка Муція Датул выдаткуе грашовы прыз у $ 25 тыс. на лячэнне маці. Пра гэта яна паведаміла ў час прэс-канферэнцыі пасля завяршэння фінальнага шоу, перадае БЕЛТА. «Я ведаю, на што патрачу грошы. Мая мама хварэе, ёй патрэбны сродкі. Грошы, якія я выйграла, пойдуць на лячэнне і набыццё лекаў», — сказала дзяўчына. Яна таксама распавяла, што пасля конкурсу зоймецца дабрачыннасцю.
Дзяўчына прызналася, што самым яркім успамінам, які яна павязе дахаты, стане наведванне Белавежскай пушчы і сустрэча з Дзедам Марозам. «Калі я была там, я паводзіла сябе, як дзіця, фатаграфавалася з ім. Беларусь назаўжды застанецца ў маім сэрцы», — сказала Муція Датул.
Фінальнае шоу міжнароднага конкурсу прыгажосці «Miss Supranational-2013» адбылося ў Палацы спорту ў Мінску. Беларуска Вераніка Чачына ўдастоена звання «Miss Supranational Еўропа».
Конкурс «Miss Supranational» уваходзіць у ТОП 3 самых прэстыжных сусветных форумаў прыгажосці. У гэтым годзе ён сабраў рэкордную колькасць удзельніц. За карону самай прыгожай дзяўчыны змагаліся прадстаўніцы 83 краін. Трансляцыю шоу ўбачылі больш за мільярд чалавек са 100 краін.