Маладыя, таленавітыя

Дзясяткі адораных дзяцей сістэматычна атрымліваюць падтрымку ад дзяржавы

Пад Новы год звычайна падлічваюць сабраны ўраджай творчых перамог супрацоўнікі Спецыяльнага фонду Прэзідэнта Беларусі па падтрымцы таленавітай моладзі. У краіне не застаецца без увагі ніводнае ўдалае выступленне юных талентаў на ўсебеларускіх і міжнародных конкурсах. У снежні на сцэне Беларускага дзяржаўнага музычнага тэатра ладзіўся вялікі эстрадны канцэрт лаўрэатаў, стыпендыятаў і дыпламантаў фонду. Ён штогод збірае лепшых маладых спевакоў, танцораў, музыкантаў. А ў мастацкай галерэі “Універсітэт культуры” і цяпер можна пабачыць творы маладых мастакоў і дызайнераў, якія атрымлівалі ўзнагароды на міжнародных конкурсах. Усе работы высокай якасці, прайшлі адбор экспертна-мастацкай камісіі Спецфонду.
Нядаўна Аляксандр Лукашэнка зацвердзіў рашэнні савета Спецфонду, паводле якога звыш 1 мільярда рублёў выдзелена на заахвочванне лепшых прадстаўнікоў таленавітай моладзі, а таксама набыццё музінструментаў для ўстаноў адукацыі сферы культуры. Гранд-прэмія, больш за 90 мільёнаў рублёў, і званне лаўрэата Спецфонду прысвоены бронзаваму прызёру дзіцячага конкурсу песні “Еўрабачанне-2013” Ільі Волкаву. Заахвочаны і іншыя ўдзельнікі яго музычнага нумара.