У Белларусі ёсць усе магчымасці стаць адмысловым усходне-еўрапейскім Ганконгам

У  Мінску адбыўся II З’езд беларускіх вучоных, апафеозам якога стала прыняцце cтратэгіі навукова-тэхнічнага развіцця нашай краіны — “Навука і тэхналогіі: 2018—2040”. Гэты сучасны маніфест інавацыйнага развіцця айчыннай навукі дазволіць у бліжэйшай перспектыве выйсці на перадавыя пазіцыі тэхнічнага прагрэсу. Найважнейшы дакумент з’яўляецца доўгатэрміновай нацыянальнай праграмай дзеянняў, асновай для ўваходжання Беларусі ў шэраг найбольш інтэлектуальна моцных дзяржаў.

Навукаёмістасць ВУП да 2040 года з цяперашніх 0,5 працэнта павінна ўзрасці да 3 (развітыя дзяржавы маюць 2—2,5 працэнта). Доля навукаёмістай прамысловай прадукцыі павялічыцца да 25 працэнтаў (цяпер 16).

Прэзідэнт узяў удзел у рабоце галоўнага навуковага форуму і нагадаў аб такім факце: за пяць апошніх гадоў у Беларусі аб’ём выпуску навукова-тэхнічнай і інавацыйнай прадукцыі павялічыўся больш чым удвая.  

Згодна са стратэгіяй, галоўным напрамкам для ўсяго беларускага грамадства застаецца рэалізацыя ўсёабдымнай нацыянальнай праграмы лічбавай эканомікі. Рэвалюцыйны па сваёй сутнасці дэкрэт аб развіцці лічбавай эканомікі, фарміраванні ІТ-краіны будзе хуткім часам падпісаны кіраўніком дзяржавы.

Новае дыханне павінна адкрыцца ў беларускай “сіліконавай даліны” — Парка высокіх тэхналогій (ПВТ): будуць створаны спрыяльныя ўмовы для прыходу ў галіну інвестыцый, актывізацыі ІТ-супрацоўніцтва на міжнародным узроўні, для ўкаранення смарт-кантрактаў, тэхналогій блакчэйн, уключаючы майнінг і абарачэнне крыптавалют. Пры ажыццяўленні здзелак у ІТ-галіне пяройдуць на выкарыстанне элементаў англійскага права. Ільготны рэжым работы ПВТ працягнецца да 2049 года. Да таго ж пашыраецца спіс напрамкаў дзейнасці для яго рэзідэнтаў: у прыватнасці, для кампаній, якія задзейнічаны на распрацоўцы тэхналогій штучнага інтэлекту, інтэрнэта рэчаў, беспілотных аўтамабіляў, фірм, звязаных з аказаннем маркетынгавых паслуг у ІТ-сферы.

Дзяржава і бізнес пастараюцца забяспечыць камфортныя ўмовы для замацавання маладых таленавітых спецыялістаў на Радзіме,  прыцягнення да сумеснай працы ў Беларусі паспяховых сусветных кампаній і карпарацый.

Найбольш выдатны прыклад краіны з развітай лічбавай эканомікай — Сінгапур, дзе ўрад вельмі зацікаўлены ў прасоўванні пытанняў лічбавізацыі эканомікі. Інфармацыйныя тэхналогіі ўкараняюцца ва ўсіх галінах жыццядзейнасці: тут дзяржаўныя паслугі пераведзены ў электронны фармат, выкарыстоўваецца анлайн-навучанне і многае іншае. Так што і ў нас ёсць усе магчымасці стаць адмысловым  усходне-еўрапейскім Ганконгам.

Вось такія навіны. Сустрэнемся...

sav@sb.by

Полная перепечатка текста и фотографий запрещена. Частичное цитирование разрешено при наличии гиперссылки.