Такой падзеі старажытная Ліда яшчэ не ведала. Пасля шматлікіх, але не дарэмных клопатаў напярэдадні свята распачалося. Ліда сустрэла гасцей памаладзелай і надзвычай прыгожай. Мяркуючы па тым, як мнагалюдна было ў горадзе ўжо ў першы дзень “Дажынак”, можна сцвярджаць: прагнозы на тое, што Ліда прыме каля 100 тысяч гасцей, спраўдзіліся.
Ганаровае права ўзняць сцяг рэспубліканскага фестывалю-кірмашу "Дажынкі-2010" было прадастаўлена лідарам спаборніцтваў з Гродзенскай вобласці: старшаму камбайнеру СВК "Граніт-Агра" Дзятлаўскага раёна Уладзіміру Гукішу і старшаму камбайнеру ААТ "Ханевічы" Свіслацкага раёна Андрэю Ламану. Галоўнымі героямі першага дня "Дажынак" сталі прызёры рэспубліканскага спаборніцтва, якія занялі другія і трэція месцы.
У першы дзень “Дажынак” прызы ў розных намінацыях атрымалі каля 150 пераможцаў з розных куткоў краіны.
Найлепшыя ў асабістым першынстве атрымалі ў падарунак камп’ютэры, тэлевізары, халадзільнікі і маразільнікі, іншую тэхніку. Прызёры сярод сельгасарганізацый і механізаваных атрадаў павязуць дадому грашовыя прэміі ў памеры адпаведна 20 і 15 мільёнаў рублёў. Прадстаўнікі СВК “Крошын” Баранавіцкага раёна сталі ўладальнікамі новага трактара “Беларус”. Так іх аддзячыў канцэрн “Белдзяржхарчпрам” за высокія паказчыкі ў здачы піваварнага ячменю.
“Цяжка размеркаваць лідэраў спаборніцтва па першым, другім і трэцім месцах, — прызнаўся на ўрачыстай цырымоніі намеснік прэм’ер-міністра Іван Бамбіза. — Усе працавалі выдатна і заслугоўваюць шчырай падзякі”.
Па яго словах, сёлетні беларускі каравай заважыў на 7 мільёнаў тон. І гэтага хопіць не толькі для таго, каб забяспечыць харчовую бяспеку нашай краіны. Мы можам падзяліцца і з суседзямі.
За апошнія пяць гадоў у развіцці АПК краіны адбыліся істотныя змены. Толькі ў сельгасгаліне стварылі 50 новых прадпрыемстваў, пераабсталявалі звыш 100 тысяч малочных ферм, 60 птушкафабрык. Арганізацыі атрымалі звыш 10 тысяч зернеўборачных камбайнаў і каля 16 тысяч трактароў, іншай тэхнікі.
У бліжэйшыя гады ўзяты курс працягнецца. Значную ўвагу плануецца ўдзяліць павышэнню ўзроўню жыцця на вёсцы. Сярэдняя зарплата сяльчан да 2015 года, як адзначыў Іван Бамбіза, павінна вырасці да 750 долараў.