На форуме абмеркавалі актуальныя пытанні стварэння «разумных» гарадоў.
Самая цікавая навіна: наша краіна можа стаць пляцоўкай для рэалізацыі праекта «разумнага» горада. Пра гэта расказаў каардынатар праграм рэгіянальнага аддзялення МСЭ для краін СНД Фарыд Нахлі. Логіка ў дадзеным выпадку простая: па яго словах, менавіта буйныя гарады валодаюць дастатковымі фінансавымі і чалавечымі рэсурсамі для рэалізацыі падобных сучасных праектаў.
— Роля міністэрстваў сувязі і МСЭ — дапамагчы там, дзе рынак не спраўляецца, у рэалізацыі лічбавай роўнасці для таго, каб «разумныя» гарады былі не толькі ў сталіцах, але і ў невялікіх гарадах, — адзначыў Фарыд Нахлі. — Бо Беларусь факусіруе развіццё на рэгіёнах, дзе ўкараняюцца аптымізацыя транспарту, «зялёныя» тэхналогіі. Гэта прыклад таго, што ніхто не павінен застацца ззаду, кожны павінен атрымаць доступ да сучасных тэхналогій.
Каардынатар праграм рэгіянальнага аддзялення Міжнароднага саюза электрасувязі намякнуў: у гэтага спецыялізаванага падраздзялення ААН ёсць магчымасці выдзяляць фінансаванне на падобныя мэты.
— У праграме МСЭ на 2017—2021 гады адзін з кірункаў — гэта «разумныя» гарады, і мы гатовыя да супрацоўніцтва. Беларусь магла б стаць выдатнай пляцоўкай для рэалізацыі такога праекта, — упэўнены ён.
Варта заўважыць, што агучаныя МСЭ прапановы нядрэнна састыкоўваюцца з мясцовымі ініцыятывамі па з’яўленні ў нашай краіне першых «разумных» гарадоў. Як нагадаў міністр сувязі і інфарматызацыі Канстанцін Шульган, цяпер вызначана 11 населеных пунктаў для рэалізацыі паскоранага сацыяльна-эканамічнага развіцця, у якіх будзе праводзіцца апрабацыя такіх канцэптуальных праектаў. Кропкавая рэалізацыя ў мінулым годзе пачалася з праекта ў Оршы: ужо зроблена адаптацыя тыпавой канцэпцыі «разумнага» горада. Сёлета па падобнай схеме плануецца зрабіць дзесяць астатніх гарадоў. Таксама на 2020—2021 гады плануецца распрацоўка асобнай адаптацыі для Мінска, аднак у Міністэрстве сувязі і інфарматызацыі падкрэслілі: гэта мерапрыемства зусім іншага маштабу і патрабуе вельмі сур’ёзнага падыходу.
Акрамя таго, Міністэрства сувязі і інфарматызацыі цяпер працуе над напаўненнем дзяржпраграмы «Лічбавае развіццё Беларусі», разлічанай на 2021—2025 гады. У яе ўвойдуць многія галіновыя мерапрыемствы і платформенныя рашэнні.
kryzhevich@sb.by